एसीच्या शॉर्टसर्किटमुळे आग लागल्याचा प्राथमिक अंदाज
मुंबई : मुंबईतील गोरेगाव पश्चिम परिसरात गुरुवारी सकाळी एका इमारतीच्या 8व्या मजल्यावरील घराला आग लागल्याची घटना घडली. न्यू लिंक रोडवरील भगतसिंग नगर क्रमांक 2 येथील हार्मनी रेसिडेन्सीमध्ये सकाळी 6.20 वाजता ही घटना घडल्याची माहिती समोर आली आहे.
मिळालेल्या माहितीनुसार, हार्मनी रेसिडेन्सी ही G+8 मजली इमारत आहे. इमारतीच्या 8व्या मजल्यावरील एका खोलीत आग लागली. एसी युनिटमध्ये शॉर्टसर्किट झाल्याने ही आग लागल्याचा प्राथमिक अंदाज व्यक्त करण्यात आला आहे. घटनेची माहिती मिळताच मुंबई अग्निशमन दलाचे पथक घटनास्थळी दाखल झाले.
मुंबई अग्निशमन दलाने सकाळी 6.28 वाजता या आगीला Level 1 म्हणजेच LI श्रेणीतील आग म्हणून घोषित केले. आग एका खोलीपुरती मर्यादित असल्याची माहिती आहे. अग्निशमन दलाकडून आग नियंत्रणात आणण्यासाठी आवश्यक कारवाई करण्यात आली.
घटनेनंतर अग्निशमन दलासोबतच पोलिस, संबंधित वीज वितरण कंपनीचे कर्मचारी, 108 रुग्णवाहिका आणि BMC च्या वॉर्ड कर्मचाऱ्यांना घटनास्थळी पाचारण करण्यात आले. आगीमुळे कोणालाही दुखापत झाल्याची माहिती अद्याप मिळालेली नाही.
दरम्यान, आगीचे नेमके कारण आणि या घटनेत किती नुकसान झाले, याबाबत अधिक माहिती मिळणे बाकी आहे.