पुणे : पुण्यातील पाषाण-बावधन रस्त्यावर शुक्रवारी सकाळी झालेल्या अपघातात 38 वर्षीय सॉफ्टवेअर इंजिनिअरचा मृत्यू झाला. हनुमान मंदिराजवळ रस्त्याच्या कडेला व्यायाम करत असताना इनोव्हा हायक्रॉस कारने त्यांना धडक दिल्याची माहिती पोलिसांनी दिली आहे. या घटनेनंतर परिसरात काही काळ खळबळ उडाली. (Pune News)

मृत व्यक्तीची ओळख वीरेंद्र राघवेंद्र प्रसाद द्विवेदी अशी झाली आहे. ते पाषाण येथील विवेकानंद सोसायटीमधील गुलमोहर प्लाझा येथे राहत होते. पोलिसांच्या माहितीनुसार, हा अपघात सकाळी 7 वाजण्याच्या सुमारास नेकलेस गार्डन परिसराच्या जवळ झाला. (Accident News)

https://www.prahaar.in/2026/09/13/heavy-rainfall-in-mumbai-ahead-of-ganpati-bappas-arrival-waterlogging-in-several-low-lying-areas/

द्विवेदी हे रस्त्याच्या कडेला व्यायाम करत असताना भरधाव कारने त्यांना धडक दिल्याचे प्राथमिक तपासात समोर आले आहे. अपघातात ते गंभीर जखमी झाले. त्यांना तातडीने जवळच्या रुग्णालयात दाखल करण्यात आले. मात्र, उपचार सुरू असतानाच त्यांचा मृत्यू झाला. (Pune Accident)

या अपघातातील कार चालकाची ओळख 19 वर्षीय इशान विशाल सेठिया अशी झाली आहे. या अपघातात तोदेखील जखमी झाला आहे. अपघातात वापरलेली इनोव्हा हायक्रॉस हायब्रीड ZX 7S कार पोलिसांनी ताब्यात घेतली असून तिचा नोंदणी क्रमांक MH12YS0622 आहे.

तपासादरम्यान ही कार ‘ब्लूरेज डेव्हलपर्स’च्या नावावर नोंदणीकृत असल्याचे पोलिसांच्या निदर्शनास आले आहे. वाहनाचा अधिकृत नोंदणीकृत पत्ता ‘अबिल हाऊस’ असा असल्याचेही समोर आले आहे.

अपघात नेमका कसा झाला, त्यावेळी कारचा वेग किती होता आणि चालकाचे वाहनावरील नियंत्रण कशामुळे सुटले, याचा पोलीस तपास करत आहेत. अपघाताचे नेमके कारण शोधण्यासाठी पाषाण-बावधन रस्ता आणि आसपासच्या परिसरातील सीसीटीव्ही फुटेज तपासले जात आहे. तसेच चालकाची वैद्यकीय तपासणीही करण्यात आली आहे.

या प्रकरणी चतुर्शृंगी पोलीस ठाण्यात भारतीय न्याय संहितेच्या कलम 106(1) आणि 281 तसेच मोटार वाहन कायद्यातील संबंधित तरतुदींनुसार गुन्हा दाखल करण्यात आला आहे. पुढील तपास पोलीस करत आहेत.