Dhule Crime : दारूच्या नशेत स्वतःच्या दोन चिमुकल्या मुलींवर काचेच्या बाटलीने जीवघेणा हल्ला केल्याची धक्कादायक घटना शिंदखेडा तालुक्यातील बाभळे फाट्यावरील पुलाखाली घडली. या प्रकरणी पित्याविरुद्ध सोनगीर पोलीस ठाण्यात (Songir Police Station) खुनाच्या प्रयत्नाचा गुन्हा दाखल करण्यात आला आहे. दिनेश आत्माराम सोलंकी (वय २१, रा. काबरी, ता. सेंधवा, जि. बडवानी, मध्य प्रदेश) असे गुन्हा दाखल झालेल्या संशयिताचे नाव आहे. या हल्ल्यात त्याच्या दोन मुली नित्या दिनेश सोलंकी (वय २) आणि दिव्या दिनेश सोलंकी (वय ४) जखमी झाल्या आहेत. दोन्ही मुलींवर सध्या उपचार सुरू असल्याची माहिती आहे.

पुलाखाली काचेच्या बाटलीने वार

पोलिसांच्या माहितीनुसार, दिनेश सोलंकी हा आपल्या कुटुंबासह बाभळे फाट्यावरील पुलाखाली आला होता. यावेळी तो दारूच्या नशेत असल्याचा आरोप आहे. कोणत्यातरी कारणावरून संतापलेल्या दिनेशने आपल्या दोन्ही मुलींवर काचेच्या बाटलीने वार केल्याचं तक्रारीत नमूद करण्यात आलं आहे. या हल्ल्यात दोन्ही मुलींच्या डोक्याला दुखापत झाली.

https://www.prahaar.in/2026/09/12/pune-crime-dispute-over-600-and-an-abusive-remark-about-his-mother-man-murders-his-own-friend/

आईने दाखल केली तक्रार

घटनेनंतर मुलींची आई राधिका दिनेश सोलंकी यांनी सोनगीर पोलीस ठाण्यात धाव घेत तक्रार दाखल केली. तक्रारीच्या आधारे पोलिसांनी दिनेश सोलंकी याच्याविरुद्ध भारतीय न्याय संहितेअंतर्गत खुनाच्या प्रयत्नाचा गुन्हा दाखल केला आहे. पोलिसांनी घटनास्थळी भेट देऊन पाहणी केली असून, जखमी मुलींना तातडीने उपचारासाठी दाखल करण्यात आलं. या प्रकरणात साक्षीदारांचे जबाब नोंदवले जात असून, हल्ल्यामागील नेमकं कारण आणि संपूर्ण घटनाक्रमाचा तपास सुरू आहे.

व्यसनाधीनतेमुळे बालकांच्या सुरक्षेचा प्रश्न

दोन चिमुकल्या मुलींवर झालेल्या या हल्ल्यामुळे परिसरात हळहळ व्यक्त होत आहे. कौटुंबिक तणाव आणि व्यसनाधीनतेमुळे लहान मुलांच्या सुरक्षिततेचा प्रश्न पुन्हा ऐरणीवर आला आहे. जखमी मुलींच्या वैद्यकीय अहवालानंतर पुढील तपासाची दिशा निश्चित केली जाणार असून, सोनगीर पोलीस या प्रकरणाचा पुढील तपास करीत आहेत.