शालेय शिक्षण विभागाचे वरिष्ठ अधिकारी शाळांमध्ये काढणार चार दिवसांचा दौरा
मुंबई : राज्यातील शाळांमधील मूलभूत सुविधा, स्वच्छता आणि विद्यार्थ्यांची शैक्षणिक गुणवत्ता सुधारण्यासाठी शालेय शिक्षण विभागाच्या वतीने राज्यभरात ‘चला शाळेत जाऊया’ हे विशेष अभियान राबविण्यात येणार असल्याची घोषणा शालेय शिक्षण मंत्री दादाजी भुसे यांनी बुधवारी केली. मुंबईतील बालभवन येथे आयोजित शिक्षण विभागाच्या ‘शिक्षण संवाद’ या एकदिवसीय कार्यशाळेत ते बोलत होते. बैठका आणि कागदी नियोजनाचे प्रतिबिंब प्रत्यक्ष शाळांमध्ये आणि विद्यार्थ्यांच्या प्रगतीत दिसले पाहिजे, असे स्पष्ट करत त्यांनी अधिकाऱ्यांना प्रत्यक्ष शाळांमध्ये जाऊन काम करण्याचे निर्देश दिले.
https://www.prahaar.in/2026/09/02/the-2018-party-constitution-centralized-authority-within-the-shiv-sena-in-the-hands-of-a-single-individual-neeraj-kishan-kauls-argument-in-the-supreme-court/
या कार्यशाळेस शालेय शिक्षण विभागाचे प्रधान सचिव रणजीत सिंह देओल, आयुक्त सचिंद्रप्रताप सिंह यांच्यासह विभागातील सर्व संचालक, उपसंचालक आणि वरिष्ठ अधिकारी उपस्थित होते. राज्यातील आठही विभागांत वरिष्ठ अधिकाऱ्यांची जिल्हानिहाय जबाबदारी निश्चित करण्यात आली असून, हे अधिकारी चार दिवसांच्या विशेष दौऱ्यात शाळांना प्रत्यक्ष भेट देऊन तिथल्या परिस्थितीचे मूल्यांकन करतील. शाळांमध्ये शुद्ध पिण्याचे पाणी, स्वच्छ स्वच्छतागृहे आणि सुरक्षित परिसर या मूलभूत सुविधांना प्राधान्य दिले जावे, तसेच बालवाटिका ते तिसरीपर्यंतच्या विद्यार्थ्यांमध्ये वाचन, लेखन आणि गणिताचे मूलभूत कौशल्य भकम करण्यावर भर द्यावा, असे निर्देश मंत्री भुसे यांनी दिले.
https://www.prahaar.in/2026/09/02/indian-badminton-player-lakshya-sens-campaign-ends/
या उपक्रमांतर्गत चांगल्या काम करणाऱ्या शाळांना प्रोत्साहन दिले जाईल, तर आवश्यक तिथे लोकसहभाग आणि सीएसआर निधीच्या माध्यमातून तातडीने सुधारणा करण्याचे आवाहन त्यांनी केले. पोषण आहार, गणवेश व विद्यार्थ्यांच्या सुविधांमध्ये कोणतीही अनियमितता खपवून घेतली जाणार नाही, असा इशारा देत शिक्षण क्षेत्राच्या विकासासाठी निधीची कमतरता भासू दिली जाणार नाही, असेही त्यांनी स्पष्ट केले. यादरम्यान प्रधान सचिव देओल आणि आयुक्त सचिंद्रप्रताप सिंह यांनीही शाळा भेटींचे नियोजन आणि स्थानिक निधीचा प्रभावी पाठपुरावा करण्याबाबत मार्गदर्शन केले.