ठाणे : ठाण्यातील कासारवडवली-मोगरपाडा परिसरातील ७८० मीटर लांबीच्या डीपी रस्त्याचे काम स्थानिक नागरिकांशी चर्चा करून सामंजस्याने पूर्ण करण्याचे निर्देश विधानसभा उपाध्यक्ष अण्णा बनसोडे यांनी संबंधित अधिकाऱ्यांना दिले आहेत. (Thane News)

या रस्त्याची रुंदी २० मीटर असून, एकूण ७८० मीटरपैकी सुमारे १८० मीटर जागा ताब्यात आली आहे. उर्वरित ६०० मीटर जागेसाठी संबंधितांना नोटिसा बजावण्यात आल्या आहेत. मात्र, जागा ताब्यात घेण्यास स्थानिक पातळीवर अडचणी येत असल्याची माहिती अधिकाऱ्यांनी बैठकीत दिली. ( DP Road Project)

https://prahaar.in/2026/08/19/umed-mall-approved-for-sindhudurg-district/

या पार्श्वभूमीवर अण्णा बनसोडे यांनी स्थानिक नागरिकांसोबत प्रत्यक्ष बैठक घेऊन त्यांच्या अडचणी समजून घेण्याच्या सूचना दिल्या. नागरिकांच्या सहकार्याने हा प्रश्न मार्गी लावून रस्त्याचे काम पूर्ण करावे, असे त्यांनी स्पष्ट केले.

एमएमआरडीएकडून या रस्त्याच्या कामासाठी मेसर्स गजानन कन्स्ट्रक्शन कंपनीला ७ फेब्रुवारी २०२५ रोजी कार्यादेश देण्यात आला आहे. मात्र, स्थानिक नागरिकांच्या विरोधामुळे काम रखडले आहे. गरज भासल्यास स्थानिक पोलिसांचे सहकार्य घेऊन काम सुरळीत करण्याच्या सूचनाही देण्यात आल्या आहेत.

तसेच, रस्त्याचे काम निर्धारित वेळेत पूर्ण करण्यासाठी ठाणे महानगरपालिकेने संबंधित कंत्राटदाराला आवश्यक सूचना द्याव्यात, असे निर्देशही अण्णा बनसोडे यांनी दिले.