चेन्नई : तामिळनाडूच्या राजकारणात मंगळवारी सकाळी एक अत्यंत मोठी आणि धक्कादायक घडामोडी समोर आली. अभिनेत्री तृषा (Trisha) हिच्यावर जाहीर सभेत अश्लील व द्विअर्थी टिप्पणी केल्याप्रकरणी राज्याचे विरोधी पक्षनेते आणि ‘डीएमके’ (DMK) नेते उदयनिधी स्टॅलिन यांना त्यांच्या राहत्या घरातून पोलिसांनी अटक केली आहे. या कारवाईमुळे संपूर्ण तामिळनाडूत राजकीय खळबळ उडाली आहे.

“अटक म्हणजे एक विनोदच!”; अटकेदरम्यान उदयनिधींची प्रतिक्रिया

सकाळी जेव्हा पोलीस उदयनिधी स्टॅलिन यांना अटक करण्यासाठी त्यांच्या घरी पोहोचले, तेव्हा परिसरात मोठा पोलीस बंदोबस्त तैनात करण्यात आला होता. पोलिसांसोबत जात असताना उदयनिधींच्या चेहऱ्यावर हसू होते. माध्यम प्रतिनिधींशी बोलताना ते म्हणाले की, “मी या अटकेला एक मोठा ‘विनोद’ मानतो आणि याविरोधात मी कायदेशीर लढाई लढेन.”

जावूरमधील सभेत नक्की काय घडलं?

सोमवारी तंजावूर येथे कावेरी पाणी वाटपाच्या मुद्यावरून विरोधी पक्षांचे आंदोलन सुरू होते. या आंदोलनात भाषण करताना उदयनिधींनी मुख्यमंत्री जोसेफ विजय (Joseph Vijay) यांच्यावर जोरदार निशाणा साधला. “तामिळनाडूला कावेरीचे एक थेंबही पाणी मिळालेले नाही, तरीही मुख्यमंत्री निर्धास्त आहेत,” असा आरोप ते करत होते. त्याच वेळी जमावातून कोणीतरी ‘तृषा… तृषा…’ असा घोषणाबाजी करण्यास सुरुवात केली. त्यावर उदयनिधींनी आपले भाषण थांबवले आणि चेहऱ्यावर उपरोधिक हास्य आणून एक आक्षेपार्ह द्विअर्थी वक्तव्य केले. त्यांच्या या वक्तव्याचा व्हिडिओ व्हायरल होताच राजकीय वातावरण तापले.

https://prahaar.in/2026/08/04/did-ekta-kapoor-replied-to-salman-khan-over-ritesh-ki-naukri-khatre-mein-hai-statement/

टीव्हीके (TVK) ची राष्ट्रीय महिला आयोगाकडे तक्रार

उदयनिधींच्या या वक्तव्यानंतर मुख्यमंत्री विजय यांच्या ‘टीव्हीके’ (TVK) पक्षाने अत्यंत आक्रमक भूमिका घेतली. पक्षाने राष्ट्रीय महिला आयोगाकडे (NCW) आणि पोलिसांकडे उदयनिधींविरोधात अधिकृत तक्रार दाखल केली. तक्रारीत म्हटले आहे की, “एका सार्वजनिक आणि राजकीय व्यासपीठावरून एका नामांकित महिला अभिनेत्रीबद्दल अशा प्रकारे अश्लील, ओंगळवाणी आणि द्विअर्थी भाषा वापरणे म्हणजे महिलांचा अपमान करण्यासारखे आहे. यामुळे समाजात महिलांचा अनादर वाढतो.”

“हा तर राजकीय सूड!”

उदयनिधी यांच्या अटकेवर सत्ताधारी आणि विरोधकांमध्ये जोरदार वाकयुद्ध सुरू झाले आहे. डीएमके नेते टी. के. एस. एलांगोवन यांनी या अटकेचा तीव्र निषेध करत म्हटले की, “उदयनिधी यांनी कोणाचाही अनादर केलेला नाही. त्यांनी केवळ मुख्यमंत्री विजय यांच्या अपयशाचा पाढा वाचला. त्यांनी भाषणात कुठेही तृषाचे नावही घेतले नव्हते. ही केवळ राजकीय सूडबुद्धीने केलेली कारवाई आहे.” तर दुसरीकडे टीव्हीकेचे नेते अमेरिका नारायणन यांनी डीएमकेचा आरोप फेटाळून लावला. ते म्हणाले, “उदयनिधींना मुख्यमंत्र्यांवर टीका केली म्हणून नाही, तर एका महिलेचा जाहीर अपमान केल्यामुळे अटक करण्यात आली आहे.”

भाजपचीही जोरदार टीका

तामिळनाडू भाजपनेही या मुद्द्यावर उदयनिधींवर जोरदार हल्लाबोल केला होता. भाजपचे मुख्य प्रवक्ते नारायणन थिरुपती यांनी म्हटले होते की, “उदयनिधी यांचे वक्तव्य अत्यंत घाणेरडे, अश्लील आणि तितकेच लाजीरवाणे आहे. आई, बहीण किंवा पत्नी असलेला कोणताही स्वाभिमानी माणूस अशी भाषा वापरणार नाही. अशा व्यक्तीला अटक करून तुरुंगात टाकणेच योग्य ठरेल.”

अभिनेत्री तृषा आणि राजकारणातील वाद

काही काळापासून अभिनेत्री तृषा आणि मुख्यमंत्री विजय यांच्यातील संबंधांच्या अफवांवरून चित्रपट आणि राजकीय वर्तुळात अनेकदा वादग्रस्त विधाने केली जात आहेत. यापूर्वी भाजप नेते नयनार नागेंद्रन यांनीही अशाच प्रकारचे विधान केले होते, ज्यावर तृषाच्या कायदेशीर टीमने कडक उत्तर दिले होते. मात्र, आता थेट विरोधी पक्षनेत्याला या प्रकरणात अटक झाल्याने हा मुद्दा राष्ट्रीय पातळीवर गाजत आहे.