ग्लासगो: २०२६ च्या राष्ट्रकुल क्रीडा स्पर्धेत भारताच्या युवा खेळाडूंनी आपल्या अफाट संघर्षमय प्रवासातून दैदीप्यमान यश संपादन केले आहे. राष्ट्रकुल खेळांच्या दहाव्या दिवशी तिहेरी उडी (ट्रिपल जंप) प्रकारात भारताच्या प्रतिभावान खेळाडू प्रवीण चित्रवेलने अटीतटीच्या सामन्यात रौप्य पदक पटकावत देशाची मान उंचावली आहे. सुवर्णपदक थोडक्यात हुकले असले, तरी प्रवीणची ही कामगिरी अत्यंत लक्षणीय आणि ऐतिहासिक ठरली आहे.

https://prahaar.in/2026/08/02/airplane-accident-horrific-plane-crash-tourist-aircraft-crashes-in-a-field-13-people-tragically-killed/

तमिळनाडूच्या तंजावर जिल्ह्यातील एका छोट्या गावात ५ जून २००१ रोजी जन्मलेल्या प्रवीणचा हा इथवर पोहोचण्याचा प्रवास अत्यंत खडतर राहिला आहे. त्याचे वडील सुरुवातीला रोजंदारीवर मजूर म्हणून काम करत असत. कुटुंबाचा उदरनिर्वाह करणे अत्यंत कठीण झाल्यामुळे त्यांनी नंतर सुरक्षा रक्षकाची नोकरी पत्करली, परंतु तरीही कुटुंबाची आर्थिक परिस्थिती बेताचीच राहिली. यामुळे प्रवीणला त्याच्या क्रीडा कारकिर्दीच्या सुरुवातीला अनेक आर्थिक अडचणींचा सामना करावा लागला.

https://prahaar.in/2026/08/02/malshej-ghat-road-collapses-in-malshej-ghat-route-completely-closed-severe-traffic-jam-on-the-alternative-route-throughout-the-night/

ग्लासगो येथे झालेल्या अंतिम सामन्यात प्रवीणची सुरुवात काहीशी संथ झाली. पहिल्या तीन फेऱ्यांनंतर तो पाचव्या स्थानावर होता आणि पदक मिळण्याची शक्यता धुसर दिसत होती. पहिल्या प्रयत्नात त्याने १६.०५ मीटर उडी मारली होती. मात्र, तिसऱ्या फेरीनंतर प्रवीणने संपूर्ण खेळाचा नूर पालटून टाकला. आपल्या चौथ्या प्रयत्नात त्याने चमकदार पुनरागमन करत १६.५८ मीटरची स्पर्धा-सर्वश्रेष्ठ उडी मारली आणि क्षणभर पदकतालिकेत आघाडी घेतली. सुवर्णपदकाची सुवर्णसंधी थोड्यासाठी हुकली असली, तरी त्याने भारतासाठी रौप्य पदक निश्चित केले. याच स्पर्धेत भारताच्या सेल्वा प्रभू थिरुमारनने १६.५२ मीटरच्या उडीसह कांस्य पदक पटकावले.

https://prahaar.in/2026/08/02/commonwealth-games-2026-lost-a-leg-in-a-horrific-accident-but-not-the-spirit-achieved-a-golden-double-winning-both-gold-and-silver/

प्रवीणच्या या यशामागे त्याच्या परिश्रमासोबतच त्याच्या प्रशिक्षकांचे मोलाचे योगदान आहे. चेन्नई सेंटर ऑफ एक्सलन्समध्ये त्याची प्रतिभा सर्वप्रथम प्रशिक्षक इंदिरा सुरेश यांनी हेरली. प्रवीणला जेव्हा गुडघ्याची गंभीर दुखापत झाली होती, तेव्हा त्यातून सावरण्यासाठी आणि त्याला मानसिक व वैयक्तिक पाठिंबा देण्यासाठी त्याच्या प्रशिक्षकांनी मोठी मदत केली. वडिलांच्या कष्टाचे चीज करत आणि अनंत अडचणींवर मात करत प्रवीण चित्रवेलने आज आंतरराष्ट्रीय स्तरावर भारताचा तिरंगा फडकवला असून, तो कोट्यवधी तरुणांसाठी प्रेरणास्थान बनला आहे.