Commonwealth Games 2026 : राष्ट्रकुल क्रीडा स्पर्धा 2026 भारताच्या अस्मिता डे (Asita Dey) हिने ज्युडोमध्ये सुवर्णपदक जिंकत देशाचे नाव उंचावले आहे. महिलांच्या 48 किलो वजनी गटाच्या अंतिम सामन्यात तिने कॅनडाच्या हेडी क्वाचचा 2-1 असा पराभव करत ऐतिहासिक विजय मिळवला. राष्ट्रकुल स्पर्धेतील हे तिच्या कारकिर्दीतील सर्वात मोठे यश मानले जात आहे.
त्रिपुरातील बेलोनिया येथील साध्या कुटुंबातून आलेल्या अस्मिताचा हा प्रवास अनेक संघर्षांनी भरलेला आहे. तिचे वडील अर्जुन कुमार डे सायकल दुरुस्तीचे छोटे दुकान चालवतात. मर्यादित उत्पन्न असूनही त्यांनी मुलीच्या शिक्षणासह क्रीडा प्रशिक्षणासाठी कोणतीही कसर ठेवली नाही. तीन भावंडांमध्ये सर्वात लहान असलेल्या अस्मिताला तिच्या कुटुंबाचा कायम पाठिंबा मिळाला.
https://prahaar.in/2026/08/01/harsh-singhs-gold-medal-performance-at-the-commonwealth-games-indias-first-gold-medal-in-mens-judo/
लहानपणी अस्मिताला धावण्याची आवड होती. ती 800 मीटर शर्यतीत सहभागी होत असे आणि जिल्हास्तरावर चांगली कामगिरीही केली होती. मात्र, तिची शारीरिक क्षमता आणि चपळता पाहून प्रशिक्षकांनी तिला ज्युडोकडे वळण्याचा सल्ला दिला. हा निर्णय तिच्या आयुष्यातील सर्वात महत्त्वाचा टप्पा ठरला.
2015 मध्ये अस्मिताला त्रिपुरा स्पोर्ट्स स्कूलमध्ये प्रवेश मिळाला. तेथे प्रशिक्षक बिना देबनाथ आणि माणिक लाल देब यांच्या मार्गदर्शनाखाली तिने ज्युडोचे प्रशिक्षण घेतले. शालेय आणि राष्ट्रीय स्तरावरील स्पर्धांमध्ये सातत्यपूर्ण यश मिळाल्यानंतर तिची भारतीय क्रीडा प्राधिकरणाच्या (SAI) भोपाळ येथील प्रादेशिक प्रशिक्षण केंद्रासाठी निवड झाली. अत्याधुनिक प्रशिक्षण आणि अनुभवी प्रशिक्षकांच्या मार्गदर्शनामुळे तिच्या खेळात आणखी सुधारणा झाली.
राष्ट्रकुल स्पर्धेपूर्वीही अस्मिताने अनेक आंतरराष्ट्रीय स्पर्धांमध्ये भारताला यश मिळवून दिले आहे. 2022 मध्ये बँकॉक येथे झालेल्या आशियाई कॅडेट आणि ज्युनियर ज्युडो स्पर्धेत तिने कांस्यपदक जिंकले होते. त्यानंतर ज्युनियर आशिया कप, खेलो इंडिया युनिव्हर्सिटी गेम्समध्ये सुवर्णपदके आणि कुवेत सिटी आशियाई ओपनमध्ये रौप्यपदकही तिच्या नावावर जमा झाले. सातत्यपूर्ण कामगिरीमुळे तिची ‘टार्गेट ऑलिम्पिक पोडियम स्कीम’ (TOPS) मध्येही निवड झाली.
राष्ट्रकुल स्पर्धेतील हे सुवर्णपदक अस्मिता डेच्या मेहनतीचे, जिद्दीचे आणि तिच्या कुटुंबाच्या संघर्षाचे मोठे यश मानले जात आहे.