अटलांटा: फिफा विश्वचषक २०२६ च्या उपांत्य फेरीत अर्जेंटिनाने इंग्लंडवर २-१ असा थरारक विजय मिळवत अंतिम फेरीत दिमाखात प्रवेश केला आहे. एक वेळ ६० वर्षांची विश्वचषक विजयाची प्रतीक्षा संपवण्याच्या उंबरठ्यावर असलेल्या इंग्लंडला, व्यवस्थापक थॉमस टुशेल यांच्या बचावात्मक धोरणामुळे अखेरच्या क्षणी पराभवाचा सामना करावा लागला. आता रविवारी न्यूयॉर्क-न्यू जर्सी स्टेडियमवर अर्जेंटिनाचा सामना स्पेनशी होईल.

https://prahaar.in/2026/07/16/ahilyanagar-ahilyanagar-finally-so-police-enforcer-suspended/

सामन्याचे नाट्यमय वळण

सामन्याच्या ५५ व्या मिनिटाला मॉर्गन रॉजर्सच्या क्रॉसवर अँथनी गॉर्डनने गोल करत इंग्लंडला १-० अशी महत्त्वाची आघाडी मिळवून दिली होती. सामन्यावर इंग्लंडचे पूर्ण नियंत्रण होते आणि संघ अत्यंत संतुलित दिसत होता. मात्र, आघाडी मिळाल्यानंतर इंग्लंडने पूर्णपणे बचावात्मक पवित्रा घेतल्याने सामन्याचे चित्र पालटले.

https://prahaar.in/2026/07/16/excellent-rapport-with-sunetra-pawar-there-is-no-discord-between-us/

टुशेलची रणनीतिक चूक

इंग्लंडचे व्यवस्थापक थॉमस टुशेल यांनी ७२ व्या मिनिटापासून एकामागोमाग एक बचावात्मक बदल केले. त्यांनी गॉर्डन, डेक्लन राइस आणि रीस जेम्स यांना बाहेर काढत एझरी कोन्सा, निको ओ’रायली आणि डॅन बर्न या डिफेंडर्सना मैदानात उतरवले. या निर्णयामुळे इंग्लंडच्या संघात चक्क सहा बचावपटू उरले आणि आक्रमक धार पूर्णपणे बोथट झाली.

याउलट, अर्जेंटिनाचे व्यवस्थापक लिओनेल स्कालोनी यांनी अत्यंत धाडसी निर्णय घेतला. त्यांनी ८१ व्या मिनिटाला डिफेंडर निकोलस टॅग्लियाफिकोला बाहेर काढून स्ट्रायकर लॉटारो मार्टिनेझला मैदानात उतरवले. याचा परिणाम त्वरित दिसून आला. सामन्याच्या उत्तरार्धात अर्जेंटिनाचा चेंडूवर ९२ टक्के ताबा होता, तर इंग्लंडला केवळ १२ टक्के ताबा ठेवता आला.

https://prahaar.in/2026/07/16/ukraine-russia-war-ukrainian-drone-attacks-disrupt-russian-maritime-traffic-tension-rises-in-the-sea-of-azov/

मेस्सीचा ‘मॅजिक’ आणि अर्जेंटिनाचे पुनरागमन

सामन्याच्या ८५ व्या मिनिटाला एन्झो फर्नांडिसने लिओनेल मेस्सीच्या पासवर गोल करत सामना १-१ असा बरोबरीत आणला. त्यानंतर भरपाई वेळेत  ९२ व्या मिनिटाला मेस्सीने पुन्हा एकदा अप्रतिम क्रॉस दिला, ज्यावर लॉटारो मार्टिनेझने हेडरद्वारे विजयी गोल नोंदवला. यासह अर्जेंटिनाने इंग्लंडचे विश्वचषक स्वप्न धुळीस मिळवले.

https://prahaar.in/2026/07/16/nashik-uniforms-in-zilla-parishad-schools-are-of-substandard-quality/

व्यवस्थापकाची कबुली

पराभवानंतर थॉमस टुशेल यांनी आपल्या रणनीतिक निर्णयांची जबाबदारी स्वीकारली. “सामन्याच्या त्या टप्प्यावर आम्ही बचावात्मक पवित्रा घेतल्याने आम्हाला चेंडूवरील ताबा राखणे कठीण गेले. हे निर्णय मी घेतले होते, त्यामुळे होणारी टीका मी स्वीकारतो,” असे ते म्हणाले.

आता या पराभवानंतर इंग्लंडचा संघ तिसऱ्या स्थानासाठीच्या ‘प्लेऑफ’ सामन्यात फ्रान्सशी भिडणार आहे, तर गतविजेता अर्जेंटिना चौथ्या विश्वविजेतेपदाच्या शोधात स्पेनविरुद्ध अंतिम लढत खेळणार आहे