अमेरिका (America) आणि इराण (Iran) यांच्यात भडकलेल्या युद्धाचे भयंकर परिणाम आता संपूर्ण जगाला भोगावे लागत आहेत. जागतिक व्यापाराचा मुख्य मार्ग असलेल्या होर्मुझच्या सामुद्रधुनीत इराणने थेट व्यापारी जहाजांना लक्ष्य करत हल्ले सत्र सुरू केले आहे. या संघर्षात कोणतीही चूक नसताना एका भारतीय नागरिकाला आपला जीव गमवावा लागला असून, अन्य १० जण जखमी झाले आहेत. आंतरराष्ट्रीय जलवाहतुकीवर या युद्धाचा मोठा परिणाम दिसून येत आहे.
पुण्याच्या सुपुत्रावर काळाचा घाला
या हल्ल्यात मृत्युमुखी पडलेले तरुण हेरंब करमरकर हे मूळचे पुण्याचे (मुंढवा परिसर) रहिवासी होते. ते मर्चंट नेव्हीमध्ये ‘थर्ड इंजिनिअर’ या पदावर कार्यरत होते. प्राप्त माहितीनुसार, रविवारी पहाटे त्यांचे ‘एमव्ही जीएफएस गॅलेक्सी’ (MV GFS Galaxy) हे कंटेनर जहाज ओमानच्या सागरी हद्दीतून मार्गक्रमण करत होते. त्याचवेळी अचानक या जहाजावर हल्ला झाला. या आणीबाणीच्या प्रसंगी जहाजावरील २३ कर्मचाऱ्यांची सुखरूप सुटका करण्यात बचाव पथकाला यश आले, मात्र दुर्दैवाने हेरंब यांना वाचवता आले नाही. सध्या त्यांचे पार्थिव पुण्यात त्यांच्या मूळ घरी आणण्यासाठी प्रशासकीय पातळीवर वेगाने हालचाली सुरू आहेत.
https://prahaar.in/2026/07/15/wo-mera-bahot-achcha-dost-hai-shahnaz-gill-reacts-to-relationship-talks-with-raghav-juyal/
क्रूझ क्षेपणास्त्रांचा वापर आणि युएईच्या जहाजांचे नुकसान
संयुक्त अरब अमिरातीच्या (UAE) संरक्षण मंत्रालयाने या संपूर्ण घटनेचा सविस्तर तपशील दिला आहे. इराणने केवळ एकाच नाही तर अनेक जहाजांवर क्रूझ क्षेपणास्त्रांचा मारा केला आहे. दक्षिण शिपिंग लेनवरून जाणाऱ्या युएईच्या जहाजांना यामध्ये लक्ष्य करण्यात आले.
- मोम्बासा: युएईचे तेलवाहू जहाज (Oil Tanker)
- अल बहिया: एलएनजी वाहून नेणारे जहाज (LNG Carrier)
क्षेपणास्त्र धडकल्याने या दोन्ही महाकाय जहाजांनी भीषण पेट घेतला होता. सुदैवाने, तत्काळ बचावकार्य राबवल्यामुळे आगीवर नियंत्रण मिळवणे शक्य झाले आणि मोठी जीवितहानी टळली.
युएईचा इराणला खणखणीत इशारा
व्यापारी जहाजांवरील या भ्याड हल्ल्यांनंतर आखाती देशांमध्ये संतापाची लाट उसळली आहे. युएईने या हल्ल्याचा तीव्र शब्दांत निषेध करत याला ‘आंतरराष्ट्रीय कायद्यांचे थेट उल्लंघन’ म्हटले आहे. “अशा प्रकारच्या बेजबाबदार कृत्यांमुळे मध्यपूर्वेतील तणाव आणखी भडकेल. शांतता भंग करणाऱ्या आणि आमच्या सुरक्षेला बाधा आणणाऱ्या कोणत्याही कारवायांना चोख आणि जशास तसे उत्तर देण्याचा पूर्ण अधिकार आम्हाला आहे,” असा सज्जड दम युएईने इराणला दिला आहे.