फिफा विश्वचषक २०२६ च्या १६ संघांच्या फेरीतील सामन्यात इजिप्तवर मिळवलेल्या रोमांचक विजयानंतर अर्जेंटिनाचा संघ पुन्हा एकदा वादाच्या भोवऱ्यात सापडला आहे. २-० ने पिछाडीवर असताना मिळवलेला हा विजय फुटबॉल चाहत्यांसाठी अविस्मरणीय असला, तरी पंचांच्या निर्णयांवर इजिप्तच्या खेळाडूंनी आणि प्रशिक्षकांनी उपस्थित केलेले प्रश्न पुन्हा एकदा चर्चेत आले आहेत. मात्र, अर्जेंटिनासाठी हे वाद काही नवीन नाहीत. १९३० पासून आजवर या फुटबॉल महासत्तेचा विश्वचषक प्रवास विवादांनी भरलेला राहिला आहे.

https://prahaar.in/2026/07/09/fifa2026-shadow-of-money-laundering-argentine-football-association-afa-under-fbi-scrutiny/

अर्जेंटिनाच्या इतिहासातील काही वादग्रस्त क्षण:

• १९३० – चेंडूचा वाद: पहिल्याच विश्वचषक स्पर्धेत उरुग्वे विरुद्धच्या अंतिम सामन्यात एक विचित्र वाद झाला. दोन्ही संघांना आपापला चेंडू वापरायचा होता. अखेरीस, फिफाने सामोपचाराने पहिल्या सत्रात अर्जेंटिनाचा आणि दुसऱ्या सत्रात उरुग्वेचा चेंडू वापरण्याचा निर्णय घेतला.

• १९७८ – हुकूमशाहीच्या छायेतील विजय: अर्जेंटिनाने त्यांचे पहिले जेतेपद मिळवले, पण ते जॉर्ज राफेल विदेला यांच्या लष्करी राजवटीत होते. पेरूवर मिळवलेला ६-० चा विजय हा आजही संशयाच्या भोवऱ्यात आहे, जो ब्राझीलला स्पर्धेतून बाहेर काढण्यासाठी घडवून आणल्याची चर्चा आजही रंगते.

• १९८६ – ‘हँड ऑफ गॉड’: दिएगो मॅराडोनाने इंग्लंडविरुद्ध हाताने केलेला गोल फुटबॉल इतिहासातील सर्वात कुप्रसिद्ध घटना ठरली. या गोलमुळे अर्जेंटिनाला १-० अशी आघाडी मिळाली आणि हा सामना आजही फुटबॉल विश्वात वादाचे केंद्र मानला जातो.

• १९९४ – मॅराडोनाची एक्झिट: ग्रीसविरुद्धच्या सामन्यानंतर ड्रग चाचणीत अयशस्वी ठरल्याने महान मॅराडोनाला स्पर्धेच्या मध्यातूनच घरी परतावे लागले. या घटनेने अर्जेंटिनाची मोहीम अचानक संपुष्टात आणली.

• १९९८ – बेकहॅमचे रेड कार्ड: अर्जेंटिना-इंग्लंड सामन्यात दिएगो सिमिओनीच्या चाणाक्ष खेळीमुळे डेव्हिड बेकहॅमला मिळालेले रेड कार्ड खेळाच्या खिलाडूवृत्तीवर प्रश्नचिन्ह उपस्थित करणारे ठरले.

• २०२२ – ‘लुसेलची लढाई’: नेदरलँड्सविरुद्धच्या उपांत्यपूर्व सामन्यात विक्रमी १८ पिवळी कार्डे दाखवण्यात आली. हा सामना इतिहासातील सर्वात तणावपूर्ण सामन्यांपैकी एक ठरला, ज्यात पंचांच्या भूमिकेवर तीव्र टीका झाली होती.

https://prahaar.in/2026/07/09/fifa-2026-major-blow-for-france-ahead-of-the-match-against-morocco-michael-olises-yellow-card-stands/

२०२६ विश्वचषक आणि वादांचे सत्र

आता २०२६ मध्ये, केप वर्देविरुद्धच्या सामन्यात पंचांच्या निर्णयांवरून झालेली कुजबुज आणि आता इजिप्तविरुद्धच्या सामन्यातील ‘VAR’ निर्णयांवरून निर्माण झालेला वाद, हे अर्जेंटिनाला पुन्हा एकदा टीकेच्या केंद्रस्थानी आणून उभे करत आहेत. जरी मेस्सीच्या जादूमुळे संघ जिंकत असला, तरी पंचांचे निर्णय आणि अर्जेंटिनाला मिळणारे ‘झुकते माप’ यावरून फुटबॉल प्रेमींमध्ये उलटसुलट चर्चा सुरू झाली आहे.

अर्जेंटिनाच्या या प्रदीर्घ प्रवासात यशाची झळाळी जेवढी आहे, तेवढीच वादांची सावलीही गडद आहे. आता विश्वचषकाच्या उर्वरित सामन्यांत हे वाद थांबतात की पुन्हा उफाळून येतात, हे पाहणे महत्त्वाचे ठरेल.