मुंबई : दापोली–पोलादपूरमार्गे महाबळेश्वर राष्ट्रीय महामार्गाला मंजुरी देण्याची मागणी भाजपचे गटनेते तथा आमदार प्रवीण दरेकर (Pravin Darekar) यांनी केंद्रीय रस्ते वाहतूक आणि महामार्ग मंत्री नितीन गडकरी (Nitin Gadkari) यांच्याकडे केली आहे. यासाठी त्यांनी नवी दिल्ली येथे गडकरी यांची भेट घेऊन सविस्तर निवेदन सादर केले.

दरेकर यांनी दिलेल्या निवेदनात दापोली, पोलादपूर आणि महाबळेश्वर यांना जोडणारा हा मार्ग कोकण आणि पश्चिम महाराष्ट्रासाठी महत्त्वाचा असल्याचे नमूद केले आहे. सध्या या मार्गावरील आंबेनळी घाटात मुसळधार पावसाच्या काळात दरडी कोसळणे, रस्ता खचणे आणि वाहतूक विस्कळीत होण्याच्या घटना वारंवार घडत असल्याने नागरिकांना मोठ्या अडचणींचा सामना करावा लागतो, असे त्यांनी सांगितले.

https://prahaar.in/2026/07/06/bmc-parks-important-news-for-mumbaikars-all-municipal-parks-will-remain-closed-tomorrow-the-decision-has-been-taken-in-view-of-strong-winds-and-rain/

राज्य सरकारकडून घाट परिसरात रस्ता रुंदीकरण, संरक्षण भिंती आणि इतर उपाययोजना करण्यात येत असल्या तरी अतिवृष्टीमुळे वाहतुकीवर परिणाम होत असल्याचे त्यांनी निदर्शनास आणून दिले.

दरेकर यांच्या मते, नवीन राष्ट्रीय महामार्ग (National Highway) उभारण्यात आल्यास कोकण आणि पश्चिम महाराष्ट्रातील संपर्क अधिक सुरक्षित आणि जलद होईल. तसेच सातारा, सांगली, कोल्हापूरसह पश्चिम महाराष्ट्रातील नागरिकांना कोकणात ये-जा करणे सोपे होईल.

https://prahaar.in/2026/07/06/mumbai-rain-mumbai-battered-by-heavy-rainfall-trees-fell-at-291-locations-and-walls-and-houses-were-damaged-at-22-locations-warning-issued-for-very-heavy-rain-over-the-next-24-hours/

या मार्गामुळे महाबळेश्वर आणि कोकणातील पर्यटनाला चालना मिळण्यास मदत होईल. याशिवाय आंबा, काजू आणि इतर कृषी उत्पादनांची वाहतूक अधिक वेगाने होऊन स्थानिक अर्थव्यवस्थेलाही फायदा होईल, असे दरेकर यांनी निवेदनात म्हटले आहे. (Maharashtra News)

या प्रस्तावासाठी आवश्यक मंजुरी आणि आर्थिक तरतूद करण्याची विनंती त्यांनी केंद्रीय मंत्र्यांकडे केली. यावर नितीन गडकरी यांनी सकारात्मक प्रतिसाद दिल्याची माहिती दरेकर यांनी दिली.