नवी दिल्ली: नीट परीक्षेच्या पेपरफुटी प्रकरणात सीबीआयने तपासाचा वेग वाढवला आहे. दिल्लीतील राऊस एव्हेन्यू न्यायालयाने या प्रकरणातील १० आरोपींच्या न्यायालयीन कोठडीची मुदत ११ जुलै २०२६ पर्यंत वाढवण्याचा निर्णय घेतला आहे.

पूर्वीची न्यायालयीन कोठडीची मुदत संपल्यानंतर, संबंधित १० आरोपींना तिहार कारागृहातून व्हिडिओ कॉन्फरन्सिंगद्वारे न्यायालयात हजर करण्यात आले. यात यश यादव, मांगीलाल बिवाल, दिनेश बिवाल, विकास बिवाल, धनंजय लोखंडे, तेजस हर्षद शहा, शुभम खैरनार, मनीषा वाघमारे, मनीषा हवालदार आणि डॉ. मनोज शिरुरे यांचा समावेश आहे. प्रल्हाद कुलकर्णी आणि शिवराज रघुनाथ मोटेगावकर हे दोन आरोपी आधीच ८ जुलैपर्यंत न्यायालयीन कोठडीत आहेत. या सुनावणीदरम्यान सीबीआयच्या वतीने वरिष्ठ सरकारी वकील व्ही. के. पाठक आणि तपास अधिकारी बी. पी. राजू यांनी बाजू मांडली.

https://prahaar.in/2026/06/29/unlimited-fuel-can-be-refilled-as-needed-central-governments-decision-brings-major-relief-to-the-transport-sector/

सीबीआयने या प्रकरणातील पेपरफुटीच्या गुंतागुंतीच्या साखळीचा पर्दाफाश केला आहे. तपासात समोर आले आहे की, शुभम खैरनारने सर्वप्रथम यश यादवला पेपर लीक केला होता. त्यानंतर, यश यादवने हा पेपर १० लाख रुपयांच्या मोबदल्यात मांगीलाल बिवालला दिला. मांगीलालने पुढे हा पेपर आपल्या मुलाला (विकास बिवाल) आणि दिनेश बिवालला उपलब्ध करून दिला. मांगीलाल बिवालने हा पेपर केवळ स्वतःच्या मुलासाठीच वापरला नाही, तर अन्य उमेदवारांनाही १२ लाख रुपयांच्या मोबदल्यात विक्री केल्याचे तपासात निष्पन्न झाले आहे.

https://prahaar.in/2026/06/29/eight-newly-elected-rajya-sabha-members-took-the-oath/

तपास यंत्रणेला मांगीलाल बिवालच्या मोबाईल फोनमध्ये नीटपरीक्षेची प्रश्नपत्रिका सापडली आहे, जो या प्रकरणातील एक भक्कम पुरावा मानला जात आहे. १२ मे रोजी एका सरकारी अधिकाऱ्याच्या तक्रारीवरून या प्रकरणी गुन्हा दाखल करण्यात आला होता. भारतीय न्याय संहिता, भ्रष्टाचार प्रतिबंधक कायदा आणि सार्वजनिक परीक्षांमधील गैरप्रकार रोखण्याशी संबंधित कलमांन्वये सीबीआयने कारवाई केली आहे. या प्रकरणातील मनीषा वाघमारे हिचा जामीन अर्ज ९ जून रोजी न्यायालयाने फेटाळून लावला होता.