ताराताला परिसरात मोठी दुर्घटना, अनेक जण जखमी

कोलकाता : पश्चिम बंगालची (West Bengal) राजधानी कोलकाता (Kolkatta) येथे बुधवारी दुपारी मोठी दुर्घटना घडली. ताराताला (Taratala) परिसरातील बांधकाम सुरू असलेली एक इमारत अचानक कोसळल्याने अनेक कामगार ढिगाऱ्याखाली अडकल्याची भीती व्यक्त करण्यात येत आहे. प्राथमिक माहितीनुसार, किमान दोन जणांचा मृत्यू झाल्याची शक्यता वर्तवली जात असली तरी अधिकृत दुजोरा अद्याप मिळालेला नाही.

ही घटना दुपारी सुमारे १.३० वाजण्याच्या सुमारास ब्रेस ब्रिज रेल्वे स्थानकाजवळील ऑक्टेव्हियस टी अँड इंडस्ट्रीजच्या गोदाम परिसरात घडली. स्थानिकांच्या माहितीनुसार, इमारत कोसळली तेव्हा आत २५ ते ३० कामगार उपस्थित होते.

https://prahaar.in/2026/06/24/major-changes-in-the-nagpur-police-force-vishwas-nangare-patil-is-the-new-cp/

मिळालेल्या माहितीनुसार, तीन मजली लोखंडी आणि सिमेंटच्या शेडचे बांधकाम आणि नूतनीकरणाचे काम सुरू होते. अचानक इमारतीचा वरचा भाग कोसळल्याने संपूर्ण रचना ढासळली आणि अनेक कामगार ढिगाऱ्याखाली अडकले.

घटनेची माहिती मिळताच पोलीस, अग्निशमन दल आणि आपत्कालीन पथके घटनास्थळी दाखल झाली. ढिगारा हटवण्यासाठी बुलडोझर, जेसीबी आणि स्टील कटिंग मशीनच्या मदतीने युद्धपातळीवर बचावकार्य सुरू करण्यात आले आहे.

https://prahaar.in/2026/06/24/nashik-news-massive-fire-at-a-company-in-the-satpur-industrial-estate/

जखमी कामगारांना तातडीने जवळच्या रुग्णालयात दाखल करण्यात आले असून ढिगाऱ्याखाली अडकलेल्या इतरांचा शोध सुरू आहे. इमारत कोसळण्यामागील नेमके कारण अद्याप स्पष्ट झालेले नसून प्रशासनाने चौकशी सुरू केली आहे.

या दुर्घटनेनंतर परिसरात चिंतेचे वातावरण निर्माण झाले असून मृतांचा आकडा वाढण्याची भीती व्यक्त केली जात आहे.