अकोला: अकोला (Akola) शहरात जुन्या वादातून 29 वर्षीय तरुणाची निर्घृण हत्या (Murder) करण्यात आल्याची धक्कादायक घटना समोर आली आहे. या घटनेमुळे परिसरात खळबळ उडाली असून नागरिकांमध्ये भीतीचे वातावरण निर्माण झाले आहे. प्राथमिक माहितीनुसार, अनैतिक संबंधांच्या संशयातून हा खून झाल्याची शक्यता वर्तवली जात आहे. (Akola Murder Case)

ही घटना रामदासपेठ पोलीस ठाण्याच्या हद्दीतील तार फैल परिसरातील डॉ. बाबासाहेब आंबेडकर चौकात घडली. मृत तरुणाचे नाव अंकुश गोपालनंदा गवली (वय 29) असे असून तो अशोक नगर परिसरातील रहिवासी होता.

https://prahaar.in/2026/06/14/i-want-to-tell-everyone-that-i-am-gay-actress-mouni-roys-first-reaction/

मिळालेल्या माहितीनुसार, अंकुशचा काही व्यक्तींशी मागील काही दिवसांपासून वाद सुरू होता. दरम्यान, तो डॉ. बाबासाहेब आंबेडकर चौक परिसरात असताना दोन जणांनी त्याला गाठले. यानंतर दोन्ही बाजूंमध्ये शाब्दिक वाद झाला. वाद विकोपाला गेल्यानंतर आरोपींनी धारदार शस्त्राने अंकुशवर सपासप वार केले.

गंभीर जखमी झालेला अंकुश रक्ताच्या थारोळ्यात कोसळला. हल्ल्यानंतर आरोपी घटनास्थळावरून फरार झाले. घटनेची माहिती मिळताच पोलिसांनी तातडीने घटनास्थळी धाव घेत जखमी अंकुशला रुग्णालयात दाखल केले. मात्र, उपचारापूर्वीच डॉक्टरांनी त्याला मृत घोषित केले.

घटनेनंतर उपविभागीय पोलीस अधिकारी सुदर्शन पाटील, रामदासपेठ पोलीस ठाण्याचे प्रभारी अधिकारी शिरीष खंडारे तसेच स्थानिक गुन्हे शाखेचे अधिकारी घटनास्थळी दाखल झाले. पोलिसांनी पंचनामा करून पुरावे गोळा केले असून मृतदेह शवविच्छेदनासाठी पाठविण्यात आला आहे.

https://prahaar.in/2026/06/14/indian-army-uniform-2026-bidding-farewell-to-british-era-traditions-major-changes-to-the-indian-army-uniform-bandi-jacket-approved/

दरम्यान, या हत्येमागे जुना वाद आणि अनैतिक संबंधांशी संबंधित कारणे असल्याची चर्चा परिसरात सुरू आहे. मात्र, याबाबत अद्याप अधिकृत दुजोरा मिळालेला नाही. फरार आरोपींचा शोध सुरू असून त्यांना लवकरच अटक करण्यात येईल, असा विश्वास पोलिसांनी व्यक्त केला आहे.