मुंबई : राष्ट्रवादी काँग्रेस अजित पवार (Ajit Pawar) गटाचे ज्येष्ठ नेते आणि राज्याचे माजी गृहमंत्री दिलीप वळसे-पाटील (Dilip Walse Patil) यांनी गुरुवारी ज्येष्ठ नेते शरद पवार (Sharad Pawar) यांची मुंबईतील ‘सिल्व्हर ओक’ या निवासस्थानी जाऊन भेट घेतली. विधानपरिषद निवडणुकीच्या धामधुमीत झालेल्या या अनपेक्षित भेटीमुळे राज्याच्या राजकीय वर्तुळात चर्चांना उधाण आले आहे. (Political News)

या भेटीविषयी शरद पवार यांनी समाजमाध्यमांवरून माहिती दिली. आपल्या पोस्टमध्ये ते म्हणाले की, “राज्याचे माजी गृहमंत्री व आमदार दिलीप वळसे-पाटील यांनी मुंबई येथील सिल्व्हर ओक या माझ्या निवासस्थानी भेट घेतली. या भेटीदरम्यान त्यांनी राज्यातील ज्वलंत कांदा प्रश्न, सहकार क्षेत्र व सहकारी संस्थांशी निगडीत विविध विषय, त्याचप्रमाणे रयत शिक्षण संस्थेच्या संदर्भातील वेगवेगळ्या मुद्द्यांवरती सखोल चर्चा केली.”

अजित पवार गटाच्या ज्येष्ठ नेत्यांनी शरद पवारांची भेट घेण्याची ही काही पहिलीच वेळ नाही. यापूर्वी १२ मे रोजी राष्ट्रवादी अजित पवार गटाचे प्रदेशाध्यक्ष सुनील तटकरे यांनीही ‘सिल्व्हर ओक’वर जाऊन शरद पवारांची भेट घेतली होती. विशेष म्हणजे तटकरे यांच्या आधी राष्ट्रीय कार्याध्यक्ष प्रफुल्ल पटेल यांनीही शरद पवारांची गुप्त भेट घेतल्याचे वृत्त समोर आले होते.