भाजपाने अमरावती मतदारसंघात प्रवीण पोटे यांना उमेदवारी दिली आहे
त्यांनी यापूर्वीही या मतदारसंघाचे नेतृत्व केले असून राज्याचे पर्यावरण, खाणकाम, उद्योग, सार्वजनिक बांधकाम राज्यमंत्री म्हणून काम केलेले आहे
मुंबई : स्थानिक स्वराज्य संस्थांच्या विधानपरिषद निवडणुकांसाठी महायुतीमध्ये जागावाटपाचे गुऱ्हाळ सुरू असतानाच, भाजपने गुरुवारी अमरावती मतदारसंघातून माजी राज्यमंत्री प्रवीण पोटे पाटील यांच्या उमेदवारीवर शिक्कामोर्तब केले. ठाणे, पुणे, कोकणसह अनेक जागांवरून शिवसेना, राष्ट्रवादी आणि भाजपमध्ये अद्यापही रस्सीखेच कायम असतानाच, भाजपने आपली पहिली अधिकृत उमेदवारी जाहीर करून आघाडी घेतली आहे.राज्यातील एकूण १७ जागांपैकी तब्बल १४ मतदारसंघांमध्ये भाजपचे स्थानिक स्वराज्य संस्थांमधील संख्याबळ मजबूत असल्याने पक्ष सध्या महायुतीत ‘मोठ्या भावाच्या’ भूमिकेत आहे. या निवडणुकीसाठी भाजपकडून शिवसेनेला ४ जागांची ऑफर देण्यात आली आहे, मात्र उपमुख्यमंत्री शिंदे ६ जागांच्या मागणीवर ठाम असल्याने जागावाटपाचा तिढा अजूनही पूर्णपणे सुटलेला नाही. या पार्श्वभूमीवर भाजपने अमरावतीची जागा स्वतःकडे ठेवत प्रवीण पोटे पाटील यांना पुन्हा एकदा निवडणुकीच्या रिंगणात उतरवले आहे. दरम्यान, प्रवीण पोटे पाटील हे शुक्रवारी दुपारी १.४५ वाजता राज्याचे महसूलमंत्री व अमरावतीचे पालकमंत्री चंद्रशेखर बावनकुळे यांच्या प्रमुख उपस्थितीत आपला उमेदवारी अर्ज दाखल करणार आहेत.
View this post on Instagram
प्रवीण पोटे यांनी यापूर्वीही विधानपरिषदेत अमरावती मतदारसंघाचे नेतृत्व केले असून, त्यांचा या मतदारसंघातील लोकप्रतिनिधींशी दांडगा संपर्क आहे. २०१४ ते २०१९ या युती सरकारच्या काळात त्यांनी राज्याचे उद्योग, खाणकाम, पर्यावरण आणि सार्वजनिक बांधकाम (सार्वजनिक उपक्रम वगळून) या खात्यांचे राज्यमंत्री म्हणून प्रभावी काम केले होते. याच कार्यकाळात त्यांच्याकडे अमरावती जिल्ह्याचे पालकमंत्री म्हणूनही जबाबदारी सोपवण्यात आली होती. त्यांचा हाच मोठा प्रशासकीय आणि राजकीय अनुभव लक्षात घेऊन भाजपने त्यांच्या गळ्यात उमेदवारीची माळ घातली आहे.