बीड : बीडमध्ये एक धक्कादायक घटना घडली आहे. सावत्र आई अन मुलाच्या अनैतिक संबंध यांचा भयानक शेवट झाला आहे. बदनामीच्या भीतीने मुलाने विष प्राशन करून आत्महत्या केली तर प्रियकराच्या मृत्यूचा धक्का सहन न झाल्याने सावत्र आईनेही रुग्णालयाच्या परिसरातच असलेल्या झाडाला गळफास घेऊन आपली जीवनयात्रा संपवली. ही घटना बीडच्या अंबाजोगाई (Ambajogai) येथे घडली आहे.

नेमकं प्रकरण काय ?

बीड जिल्ह्यातील केज तालुक्यातील सोनी जवळा येथील एका व्यक्तीचा पहिल्या पत्नीसोबत घटस्फोट झाला होता. त्यानंतर चार वर्षांपूर्वी त्यांनी अनिता नावाच्या महिलेशी त्याने दुसरे लग्न केले. पती पत्नीचा संसार सुरू असतानाच, पहिल्या पत्नीचा २१ वर्षीय मुलगा अनिल पवार याचे आपल्या सावत्र आईशी (अनिता) प्रेमसंबंध जुळले. दोघांतील प्रेमसंबंध इतके बनले की काही दिवसांपूर्वी अनिल आणि अनिता हे दोघे घरातून थेट तेलंगणा राज्यात पळून गेले.

https://prahaar.in/2026/05/28/bihar-boat-accident-tragedy-2-brutally-killed-7-critically-injured-5-missing-over-14-passenger-boat-overturns-ganga-river-barh-bihar-latest-accident/

बदनामीच्या भीतीने आयुष्य संपवलं

आपली पत्नी आणि मुलगा दोघेही बेपत्ता झाल्याने पतीने चिंतेत पोलिसांत धाव घेतली. पोलिसांनी तातडीने चक्र फिरवत तेलंगणा (Telangana )गाठून त्या दोघांनाही ताब्यात घेतले. आपले अनैतिक संबंध आता सगळ्यांना समजतील या भीतीपोटी आणि नैराश्यातून अनिल याने विषारी औषध प्राशन करून आयुष्य संपवण्याचा निर्णय घेतला. भीतीपोटी अनिलने थेट विष प्राशन केले.

प्रकृती खालावल्याने नातेवाईकांनी त्याला अंबाजोगाई येथील स्वामी रामानंद तीर्थ रुग्णालयात (Swami Ramanand Tirtha Hospital) दाखल केले. मात्र, उपचार सुरू असतानाच अनिलचा मृत्यू झाला. तर आपला प्रियकर (नात्याने सावत्र मुलगा) अनिल याच्या मृत्यूची बातमी समजताच अनिता हिला तीव्र धक्का बसला. हा विरह सहन न झाल्याने तिने स्वामी रामानंद तीर्थ वैद्यकीय महाविद्यालय सभागृहाच्या पाठीमागे असलेल्या एका झाडाला गळफास लावून आपली जीवनयात्रा संपवली. या घटनेने परिसरात एकच खळबळ उडाली असून या प्रकरणी पोलीस अधिक तपास करीत आहेत.