आसाम : आसाममधील धुबड़ी, कोकराझार आणि बंगाईगांव जिल्ह्यांमध्ये आज म्हणजेच शनिवार ९ मे रोजी वेगवेगळ्या वेळेस भूकंपाचे (Assam Earthquake) धक्के जाणवले. मात्र, सध्या कुठूनही कोणत्याही जीवित किंवा वित्तहानीची अथवा अप्रिय घटनेची माहिती समोर आलेली नाही.

भारतीय सिस्मोलॉजी केंद्रानुसार, सर्वात तीव्र धक्का कोकराझार जिल्ह्यात दुपारी २ वाजून ४० मिनिटांनी जाणवला. रिश्टर स्केलवर त्याची तीव्रता ४.५ इतकी नोंदवण्यात आली. भूकंपाचे केंद्र जमिनीखाली १० किलोमीटर खोलीवर होते. त्याचे एपिसेंटर २६.२१४ उत्तर अक्षांश आणि ९०.१०३ पूर्व रेखांशावर नोंदवण्यात आले. यानंतर धुबड़ी जिल्ह्यात दुपारी ३ वाजून १७ मिनिटांनी भूकंपाचे धक्के जाणवले. येथे रिश्टर स्केलवर तीव्रता ३.६ इतकी नोंदवली गेली. भूकंपाचे केंद्र जमिनीखाली १० किलोमीटर खोलीवर होते. त्याचे एपिसेंटर २६.२७० उत्तर अक्षांश आणि ९०.१६३ पूर्व रेखांशावर असल्याचे सांगण्यात आले. तर, बंगाईगांव जिल्ह्यात दुपारी १२ वाजून ०३ मिनिटांनी सौम्य भूकंपाचे धक्के जाणवले. रिश्टर स्केलवर त्याची तीव्रता २.६ इतकी मोजण्यात आली. भूकंपाचे केंद्र जमिनीखाली ५ किलोमीटर खोलीवर होते. त्याचे एपिसेंटर २६.४८८ उत्तर अक्षांश आणि ९०.६५५ पूर्व रेखांशावर नोंदवण्यात आले.

https://prahaar.in/2026/05/09/pm-modi-questions-eknath-shinde-about-the-helicopter-incident/

भूकंपाचे धक्के जाणवल्यानंतर लोकांमध्ये काही काळ भीतीचे वातावरण निर्माण झाले आणि अनेक लोक घरांमधून तसेच कार्यालयांमधून बाहेर पडले. प्रशासन परिस्थितीवर लक्ष ठेवून आहे.

विशेष म्हणजे, ईशान्य भारत सातत्याने भूकंपीय हालचालींचा सामना करत आहे. गेल्या ८ मे रोजी आसामच्या कार्बी आंगलोंग जिल्ह्यात २.८ तीव्रतेचा भूकंप नोंदवला गेला होता, तर अरुणाचल प्रदेशातील पापुम पारे जिल्ह्यात ३.६ तीव्रतेचे धक्के जाणवले होते. याशिवाय ७ मे रोजी मेघालयमध्ये ३.०, आसाममध्ये २.७ आणि अरुणाचल प्रदेशात ३.६ तीव्रतेचे भूकंप नोंदवले गेले होते.

https://prahaar.in/2026/05/09/maharashtra-rain-alert-heavy-rains-will-occur-in-the-state-on-this-day-in-the-middle-of-summer-the-meteorological-department-predicts/

तज्ज्ञांच्या मते, संपूर्ण ईशान्य क्षेत्र भूकंपाच्या दृष्टीने अत्यंत संवेदनशील मानले जाते. नोव्हेंबर २०२५ मध्ये भारतीय मानक ब्युरो (बीआयएस) यांनी जारी केलेल्या नव्या भूकंपीय क्षेत्र निर्धारण नकाशात (आयएस १८९३:२०२५) ईशान्य भारताला सर्वाधिक धोकादायक झोन-VI मध्ये समाविष्ट करण्यात आले आहे. यापूर्वी हा भाग झोन-V मध्ये होता, मात्र वाढत्या भूकंपीय धोक्याचा विचार करून त्याला नव्या सर्वोच्च श्रेणीत ठेवण्यात आले आहे.