मुंबई (विशेष प्रतिनिधी)

मुंबईत ज्या ठिकाणी नाले स्वच्छतेची कामे सुरू आहेत, त्या ठिकाणी सीसीटीव्ही कॅमेरे बसवावेत. तसेच, स्थानिक लोकप्रतिनिधींना नाले स्वच्छतेच्या कामांचे प्रत्यक्ष निरीक्षण करता यावे व प्रगतीची माहिती सुलभपणे उपलब्ध व्हावी, यासाठी आवश्यक सुविधा उपलब्ध करून द्याव्यात. पावसाळ्याच्या पार्श्वभूमीवर मुंबईतील नाले स्वच्छता मोहीम अधिक परिणामकारक व्हावी, यासाठी काटेकोर नियोजन व अंमलबजावणी वर विशेष भर द्यावा, असे विविध निर्देश महापौर रितू तावडे यांनी दिले. तसेच आवश्‍यक त्‍या ठिकाणी रोबोटिक यंत्रणेचा वापर करावा,असेही निर्देश दिले आहेत.

https://prahaar.in/2026/05/06/kandivali-dr-babasaheb-ambedkar-hospital-super-specialty-project-work-at-dr-babasaheb-ambedkar-hospital-in-kandivali-is-in-full-swing/

मुंबईच्या महापौर रितू तावडे यांनी स्‍थायी समिती अध्‍यक्ष प्रभाकर शिंदे यांच्‍यासमवेत मंगळवारी ५ मे २०२६ रोजी सकाळी पूर्व उपनगरांतील विविध ठिकाणी सुरू असलेल्या पावसाळापूर्व कामांची प्रत्यक्ष भेट देत पाहणी केली. त्यावेळी त्या बोलत होत्या. ‘एस आणि टी’ प्रभाग समिती अध्यक्ष साक्षी दळवी, एम पश्चिम प्रभाग समिती अध्यक्ष आशा मराठे आणि एल प्रभाग समिती अध्यक्ष विजयेंद्र शिंदे, नगरसेवक दीपक सावंत, नगरसेवक प्रकाश गंगाधरे, नगरसेवक सुषम सावंत, नगरसेविका चित्रा सांगळे, उप प्रमुख अभियंता (पर्जन्य जलवाहिन्या) संजय इंगळे, उप प्रमुख अभियंता (रस्ते) विशाल ठोंबरे, सहायक आयुक्त (एम पश्चिम विभाग) शंकर भोसले यांच्‍यासह पर्जन्य जलवाहिन्या, रस्‍ते व वाहतूक विभागाचे संबंधित अधिकारी यावेळी उपस्थित होते.

प्रारंभी, महापौर तावडे यांनी भांडुप (पूर्व) येथील उषा नगर नालेस्‍वच्‍छता कामाची पाहणी केली. उषा नगर नाल्‍यावरील मध्‍य रेल्‍वे रूळाखालील अंदाजे ३ मीटर रूंदीच्‍या चार पेटिका मोरीच्‍या स्‍वच्‍छतेचे जटील काम स्‍वयंचलित स्‍वींग लोडर या मशीनचा वापर करून करण्‍यात येत आहे. याबाबतची माहिती घेतल्‍यावर महापौर तावडे म्‍हणाल्‍या की, नाल्‍यास संरक्षक भिंत उभारून सुरक्षितता आणि दीर्घकालीन उपाययोजना सुनिश्चित करावी. आवश्‍यक त्‍या ठिकाणी रोबोटिक यंत्रणेचा वापर करावा.त्‍यानंतर, महापौर तावडे यांनी मुलुंड (पूर्व) येथील गव्हाणपाडा अग्निशमन केंद्राजवळील बाऊंड्री नाल्‍याची पाहणी केली. ४ मे २०२६ पर्यंत या नाल्‍यातून ३ हजार ३४१ मेट्रिक टन गाळ काढण्‍यात आला आहे. नाल्यांतील गाळ काढण्याच्या कामांना तातडीने गती देऊन ती सर्व कामे ३१ मे २०२६ पर्यंत पूर्ण करावीत, असे निर्देश महापौर तावडे यांनी यावेळी दिले.

https://prahaar.in/2026/05/05/chennai-super-kings-victory-delhi-capitals-defeat/

घाटकोपर येथील गारोडिया नगर मेट्रो स्‍थानकाखालील सोमय्या नालेस्‍वच्‍छतेची पाहणी करताना महापौर श्रीमती तावडे म्‍हणाल्‍या की, दिनांक ४ मे २०२६ पर्यंत १२१ मेट्रिक टन गाळ काढण्‍यात आला आहे. नालेस्‍वच्‍छतेचे काम प्रगतिपथावर असले तरी ३१ मे २०२६ पर्यंत ठरवलेल्या उद्दिष्टाइतका पूर्ण गाळ उपसा करण्‍याचे उद्दिष्‍ट आहे. त्‍यासाठी अधिकचे मनुष्‍यबळ, यंत्रसामुग्री वापरावी, असे महापौर म्हणाल्या. कुर्ला (पश्चिम) येथील साकीनाका मेट्रो स्‍थानकाखालील नाला क्रमांक १० ची पाहणी केल्‍यानंतर प्रसारमाध्‍यम प्रतिनिधींशी बोलताना महापौर तावडे म्‍हणाल्‍या की, सखल भागामुळे या परिसरात पाणी साचण्‍याची समस्‍या उद्भवते. त्‍यावर मात करण्‍यासाठी व सांडपाणी वहन प्रक्रिया सुलभ व्‍हावी यासाठी विविध उपाययोजना राबवाव्‍यात. सफेद पूल येथील नाल्‍याची आधुनिक यंत्रांनी स्‍वच्‍छता करावी. गाळासमवेतच तरंगत्‍या वस्‍तू, नाल्‍यात टाकलेल्‍या गृहोपयोगी साहित्‍याची विल्‍हेवाट लावावी, असे निर्देश महापौरांनी दिले.

https://prahaar.in/2026/05/05/sit-to-investigate-the-bogus-birth-and-death-certificate-case-in-mumbai/

मुलुंडमध्ये ७५०० प्रकल्प बाधितांच्या सदनिका : 

नालेस्‍वच्‍छतेसमवेतच महापौर रितू तावडे यांनी टी विभागातील टाटा कॉलनी नवीन विकास आराखडा रस्‍ता आणि मुलुंड (पूर्व) येथील पीएपी मार्ग येथील रस्‍ते काँक्रिटीकरण कामांची पाहणी केली. रस्‍ते कामांची गुणवत्‍ता, विविध उपयोगिता वाहिन्या, सुगम्‍य पदपथ, रस्त्यालगतची झाडे, पाणी निचरा होण्याची व्यवस्था याबाबत अभियंत्‍यांनी दक्ष राहावे. रस्‍ते कामे ३१ मे २०२६ पर्यंत पूर्ण करून वाहतुकीस खुले करावेत, असेदेखील निर्देश महापौर रितू तावडे यांनी दिले. महानगरपालिकेच्‍या वतीने मुलुंड (पूर्व) येथे प्रकल्‍पबाधितांसाठी ७ हजार ५०० सदनिकांच्या गृहप्रकल्‍पाचे बांधकाम सुरू आहे. या गृहप्रकल्‍पाला भेट देत महापौर तावडे यांनी सदनिकांची पाहणी केली. तसेच, हा गृहप्रकल्‍प कालमर्यादेत पूर्ण करून प्रकल्‍पबाधितांचे लवकरात लवकर पुनर्वसन करावे, अशी सूचना केली.