जर्मनीतील मोर्स शहरातील ड्यूसबर्ग भागात असलेल्या एका गुरुद्वारात दोन गटांमध्ये अचानक हिंसक झटापट झाली. या घटनेत किमान ११ जण जखमी झाले आहेत. माहितीनुसार, हा वाद इतका वाढला की या वादात चाकू, कृपाण, पेपर स्प्रे आणि अगदी पिस्तुलाचाही वापर करण्यात आला. या भांडणात सुमारे ४० जण सहभागी होते, असे सांगितले जात आहे.

गुरुद्वारात धार्मिक कार्यक्रम सुरू होण्याच्या तयारीत असतानाच दोन्ही गटांमध्ये वाद वाढला आणि हातघाईतून तो हिंसाचारात बदलला. सोशल मीडियावर काही व्हिडिओही समोर आले असून त्यामध्ये लोक एकमेकांवर हल्ला करताना दिसत आहेत.

प्रत्यक्षदर्शींनी सांगितले की, काही लोकांनी अचानक पेपर स्प्रेचा वापर केला. त्यानंतर एका व्यक्तीने पिस्तुलातून गोळीबार केला, तर अनेकांकडे चाकू आणि कृपाणसारखी धारदार शस्त्रे होती. मात्र, पोलिसांना अद्याप खरे पिस्तूल सापडलेले नाही. प्राथमिक तपासात हे ब्लँक-फायरिंग पिस्तूल असू शकते, असे समोर आले आहे. अशा प्रकारच्या पिस्तुलातून खरी गोळी झाडली जात नाही, मात्र आवाज आणि स्फोटासारखा धक्का निर्माण होतो.

https://prahaar.in/2026/04/21/manipur-earthquake-5-2-magnitude-earthquake-hits-manipur-panic-among-citizens/

पोलिसांच्या प्राथमिक तपासात हा वाद गुरुद्वारा समितीच्या निवडणुका आणि निधी (पैसे) यावरून झाल्याचे समोर आले आहे. जुन्या आणि नव्या व्यवस्थापनामध्ये बऱ्याच काळापासून तणाव होता. गुरुद्वारावरील नियंत्रण आणि निर्णय घेण्याच्या अधिकारावरून दोन्ही गट आमनेसामने आले होते.एका मध्यमवयीन प्रत्यक्षदर्शीने सांगितले की, हा हल्ला आधीपासून नियोजित वाटत होता.

या घटनेची माहिती मिळताच मोठा पोलिस बंदोबस्त घटनास्थळी दाखल झाला. विशेष टॅक्टिकल युनिटलाही तैनात करण्यात आले. सर्व जखमींवर घटनास्थळीच उपचार करण्यात आले. दरम्यान, एका संशयिताला ताब्यात घेण्यात आले असून नेमका कोणी कोणावर हल्ला केला, याचा तपास पोलिस करत आहेत.