मुंबई : महानगरातील अंधेरी परिसरातून ड्रग्ज तस्करीचा एक थक्क करणारा प्रकार समोर आला आहे. सहार रोडवरील अवघ्या १३ हजार रुपये भाड्याच्या एका छोट्याशा खोलीत तब्बल ३० कोटी रुपयांच्या ‘एमडी’ (सिंथेटिक ड्रग्ज) निर्मितीचा कारखाना सुरू असल्याचे पोलिसांनी उघडकीस आणले आहे. या कारवाईमुळे मुंबईतील ड्रग्ज तस्करीचे जाळे किती खोलवर पसरले आहे, हे पुन्हा एकदा स्पष्ट झाले आहे. या प्रकरणी पोलिसांनी मोहम्मद आरिफ मोहम्मद इलियास शेख (४४) या कुख्यात तस्कराला अटक केली आहे. धक्कादायक बाब म्हणजे, आरोपी आरिफ हा यापूर्वी गुजरात पोलिसांच्या ताब्यातून फरार झाला होता आणि गेल्या काही काळापासून मुंबईत नाव बदलून सक्रिय होता. या छोट्या खोलीत त्याने अत्याधुनिक यंत्रणा बसवून मोठ्या प्रमाणावर अमली पदार्थांचे उत्पादन आणि पुरवठा सुरू केला होता. पोलिसांनी या छाप्यात मोठ्या प्रमाणात मुद्देमाल जप्त केला असून, या रॅकेटमध्ये अजून कोणाचे हात गुंतले आहेत याचा तपास सुरू आहे.

https://prahaar.in/2026/04/14/bihar-new-cm-announcement-live-updates-nitish-kumar-resignation-bjp-cm-name-samrat-choudhary-patna/

भास्कर चाळीतील ‘त्या’ खोलीत काय चालायचे ?

एका साध्या चाळीतून चालणाऱ्या कोट्यवधींच्या काळ्या धंद्याचा पोलिसांनी पर्दाफाश केला आहे. भास्कर चाळीत अवघ्या १३ हजार रुपये भाड्याने घेतलेल्या एका खोलीत चक्क एमडी ड्रग्जची फॅक्टरी चालवली जात होती. अत्यंत साध्या सेटअपमध्ये हे अमली पदार्थ तयार केले जात असल्याने कोणालाही याचा संशय आला नाही. तपासात समोर आलेल्या माहितीनुसार, आरोपी अत्यंत हुशारीने हे रॅकेट चालवत होता. स्थानिक पातळीवर संशय येऊ नये म्हणून त्याने आजूबाजूच्या परिसरात ड्रग्जची विक्री पूर्णपणे टाळली होती. त्याऐवजी, बाहेरील नेटवर्कच्या माध्यमातून या ड्रग्जचा पुरवठा केला जात असे. एका लहानशा खोलीतून दरमहा २५ ते ३० कोटी रुपयांच्या ड्रग्जची निर्मिती केली जात असल्याचे उघड झाले असून, या मोठ्या रॅकेटच्या जाळ्याचा आता पोलीस कसून तपास करत आहेत.

एका संशयास्पद हालचालीने उघडले फॅक्टरीचे गुपित

खार पोलिसांच्या नियमित गस्तीदरम्यान एका संशयित हालचालीने ड्रग्ज माफियांना मोठा हादरा दिला आहे. खार पोलिसांनी गस्त घालत असताना एका इसमाला संशयास्पदरित्या फिरताना पाहिले आणि त्याला ताब्यात घेतले. सुरुवातीला साध्या वाटणाऱ्या या कारवाईतून पुढे एका भव्य ड्रग्ज रॅकेटचा पर्दाफाश झाला. पोलिसांनी जेव्हा आरोपीची झडती घेतली, तेव्हा त्याच्याकडे १५.४४ ग्रॅम एमडी ड्रग्ज आणि एक मोबाईल सापडला. पोलिसांनी खाक्या दाखवताच आरोपीने पोपटासारखे बोलायला सुरुवात केली, ज्यातून अंधेरीतील त्या ‘सिक्रेट’ फॅक्टरीची माहिती समोर आली. या माहितीच्या आधारे पोलिसांनी तात्काळ अंधेरीतील खोलीवर छापा टाकला. या कारवाईत ड्रग्ज तयार करण्यासाठी लागणारी घातक रसायने आणि आधुनिक उपकरणे जप्त करण्यात आली आहेत. एका छोट्याशा धाग्यावरून पोलिसांनी थेट ड्रग्ज निर्मितीच्या केंद्रापर्यंत पोहोचण्यात यश मिळवले आहे

प्रतापगडमधून मुख्य साथीदाराला बेड्या

या रॅकेटमध्ये महत्त्वाची भूमिका बजावणारा मुख्य आरोपीचा साथीदार रिजवान अहमद लियाकत अली याला उत्तर प्रदेशातील प्रतापगड येथून अटक करण्यात आली आहे. या अटकेमुळे हे ड्रग्ज नेटवर्क केवळ मुंबईपुरते मर्यादित नसून त्याचे जाळे देशभर पसरल्याचे स्पष्ट झाले आहे. मुंबईत ड्रग्ज तयार केल्यानंतर त्याच्या वितरणात आणि रॅकेटच्या विस्तारात रिजवानचा मोठा हात असल्याचा संशय पोलिसांना आहे. उत्तर प्रदेशातून झालेल्या या कारवाईमुळे आता अनेक मोठे खुलासे होण्याची शक्यता वर्तवली जात आहे. हे नेटवर्क अजून किती राज्यांमध्ये सक्रिय आहे आणि यामध्ये आणखी कोणाचे पाठबळ आहे, याचा शोध आता पोलीस घेत आहेत.

पोलिसांकडून बँक खात्यातील २६ लाख गोठवले

मुख्य आरोपी मोहम्मद आरिफ शेख याच्या या काळ्या धंद्यात त्याची पत्नी नसरीन ही देखील सक्रिय सहभागी असल्याचे तपासात उघड झाले आहे. ड्रग्ज विक्रीतून येणाऱ्या लाखो रुपयांच्या व्यवहारांचा आणि हिशोबाचा संपूर्ण ताबा नसरीनकडे होता. पोलिसांनी या कारवाईत तत्परता दाखवत नसरीनच्या बँक खात्यातील २६ लाख रुपयांची रक्कम गोठवली (Freeze) आहे. तपासादरम्यान मुख्य आरोपी आरिफची गुन्हेगारी कुंडलीही समोर आली आहे. आरिफ हा सराईत गुन्हेगार असून त्याच्यावर १५ पेक्षा जास्त गंभीर गुन्हे नोंदवलेले आहेत. विशेष म्हणजे, गुजरात मधील एका ड्रग्ज प्रकरणात त्याला १० वर्षांची सक्तमजुरी सुनावण्यात आली होती. मात्र, २०२३ मध्ये पॅरोलवर बाहेर आल्यानंतर त्याने पोलिसांना गुंगारा दिला आणि मुंबईत येऊन पुन्हा ड्रग्जचे साम्राज्य उभे केले. आता पती-पत्नी दोघेही पोलिसांच्या रडारवर असून या रॅकेटची पाळेमुळे खोदली जात आहेत.

सुरक्षा यंत्रणांच्या कार्यक्षमतेवर मोठे प्रश्नचिन्ह!

इतका मोठा गुन्हेगारी इतिहास असलेला आरोपी पोलिसांच्या डोळ्यादेखत मुंबईत सक्रिय राहिलाच कसा? हा आता तपासाचा मुख्य विषय ठरला आहे. सध्या पोलीस केवळ आरोपींच्या अटकेवर न थांबता, या अमली पदार्थांच्या व्यवसायातील संपूर्ण ‘सप्लाय चेन’ (पुरवठा साखळी) उद्ध्वस्त करण्याच्या तयारीत आहेत. या रॅकेटमध्ये गुंतलेले इतर पडद्यामागचे सूत्रधार आणि त्यांना मदत करणारे स्थानिक दुवे शोधण्यासाठी पोलिसांनी विशेष पथके तैनात केली आहेत. आगामी काळात या प्रकरणात आणखी काही धक्कादायक खुलासे होण्याची शक्यता आहे.