मुंबई : महिलांच्या लैंगिक शोषणाप्रकरणी कोठडीत असलेल्या भोंदूबाबा अशोक खरात याच्याभोवतीचा चौकशीचा फास अधिक घट्ट होत चालला असून, आता या प्रकरणाला आंतरराष्ट्रीय ‘मनी लाँड्रिंग’चे वळण मिळाले आहे. अशोक खरातने ऑस्ट्रेलिया, दुबईसह पाच देशांमध्ये हवालामार्फत हजारो कोटी रुपये पाठवल्याचा खळबळजनक आरोप राष्ट्रवादी काँग्रेसचे (शरद पवार) आमदार रोहित पवार यांनी केला आहे. हे प्रकरण एका भोंदूबाबापुरते मर्यादित नसून, ते एका मोठ्या ‘नेक्सस’चा भाग असल्याने याची केंद्रीय तपास यंत्रणांमार्फत चौकशी करण्यात यावी, अशी मागणीही त्यांनी केली आहे. सध्या या प्रकरणाची चौकशी विशेष तपास पथकाद्वारे (एसआयटी) केली जात आहे.
रोहित पवार म्हणाले, “अशोक खरात याने भ्रष्ट अधिकारी आणि भ्रष्ट राजकीय नेत्यांचे हजारो कोटी रुपये हवालामार्फत परदेशात वळवले आहेत. ऑस्ट्रेलिया आणि दुबईसह अन्य चार-पाच देशांमध्ये हे पैसे पाठवण्यात आले असून, हे प्रकरण देशाच्या सुरक्षेला आव्हान देणारे आहे. राज्य सरकारकडे यासंदर्भात पुरेसे पुरावे आले असतील, तर गृह विभागाने या प्रकरणाचा वापर राजकीय गोळाबेरजेसाठी करू नये. उलट, राष्ट्रीय सुरक्षेचा प्रश्न विचारात घेऊन याची सखोल चौकशी करावी. या प्रकरणात आता तरी ईडीसारख्या यंत्रणांना जाग येईल का?” असा खोचक सवालही त्यांनी केला.