पहिल्या महिला आयुक्त होण्याचा मान; फडणवीस-शिंदे यांच्या बैठकीत शिक्कामोर्तब

मुंबई : गेल्या काही दिवसांपासून सुरू असलेल्या तर्क-वितर्कांना पूर्णविराम देत, मुंबई महापालिकेच्या आयुक्तपदी अश्विनी भिडे यांची नियुक्ती निश्चित झाली आहे. मुंबई महापालिकेच्या दीडशे वर्षांहून अधिक काळाच्या इतिहासात या सर्वोच्च पदावर विराजमान होणाऱ्या त्या पहिल्या महिला अधिकारी ठरणार आहेत. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यात ‘वर्षा’ निवासस्थानी झालेल्या प्रदीर्घ बैठकीनंतर भिडे यांच्या नावावर शिक्कामोर्तब करण्यात आले, अशी माहिती उच्चपदस्थ सूत्रांनी दिली.

अश्विनी भिडे या १९९५ च्या तुकडीच्या आयएएस अधिकारी असून, सध्या त्या मुख्यमंत्री कार्यालयात अतिरिक्त मुख्य सचिव आणि ‘मुंबई मेट्रो’च्या व्यवस्थापकीय संचालक म्हणून कार्यरत आहेत. मेट्रो प्रकल्पांना गती देण्यात त्यांनी बजावलेल्या कामगिरीमुळे त्यांना प्रशासकीय वर्तुळात ‘मेट्रो वूमन’ म्हणून ओळखले जाते. मुख्यमंत्री आणि उपमुख्यमंत्री या दोन्ही नेत्यांचा भिडे यांच्या कार्यक्षमतेवर विश्वास असल्याने, आणि शहरातील पायाभूत सुविधांची आव्हाने पाहता त्यांच्याकडे ही जबाबदारी सोपवण्यात आल्याचे समजते.

मुंबई महापालिका आयुक्तपदासाठी प्रशासकीय वर्तुळातील अनेक बड्या नावांची चर्चा सुरू होती. यामध्ये प्रामुख्याने महसूल विभागाचे अतिरिक्त मुख्य सचिव विकास खारगे, एमएमआरडीएचे आयुक्त डॉ. संजय मुखर्जी, नगरविकास विभागाचे अतिरिक्त मुख्य सचिव असीम गुप्ता, म्हाडाचे उपाध्यक्ष संजीव जयस्वाल यांचा समावेश होता. मात्र, भिडे यांच्या नावावर शिक्कामोर्तब करण्यात आले. लवकरच याबाबत अधिकृत घोषणा केली जाणार आहे.

कोण आहेत IAS अश्विनी भिडे ?

१९९५ च्या बॅचच्या आयएएस अधिकारी आणि मुख्यमंत्री कार्यालयातील विद्यमान अतिरिक्त मुख्य सचिव अश्विनी भिडे यांची मुंबई महापालिका आयुक्त म्हणून नियुक्ती करण्यात आली आहे. त्या ३१ मार्च २०२६ रोजी कार्यकाळ संपणाऱ्या भूषण गागराणी यांच्याकडून पदभार स्वीकारणार आहेत. तसेच त्या मुंबई महानगरपालिकेचे नेतृत्व करणाऱ्या पहिल्या महिला आहेत.

अश्विनी भिडे या पायाभूत सुविधा प्रकल्पांमधील त्यांच्या ठाम भूमिकेसाठी ओळखल्या जातात, विशेषतः मुंबई मेट्रो रेल कॉर्पोरेशनच्या (एमएमआरसीएल) माजी व्यवस्थापकीय संचालक म्हणून त्यांच्या कामाचे अनेकांनी कौतुक केले आहे.

संजय मुखर्जी आणि असीम गुप्ता यांच्यासारख्या अनेक वरिष्ठ आयएएस अधिकाऱ्यांचा विचार झाला पण अखेरीस अश्विनी भिडे यांची निवड झाली.

अश्विनी भिडे यांच्याकडून महत्त्वपूर्ण नागरी पायाभूत सुविधा आणि शहर प्रशासनाचे प्रकल्प हाताळण्याची अपेक्षा व्यक्त होत आहे. त्यांचा पूर्ण कार्यकाळ २०३० पर्यंत अपेक्षित आहे.