भाजपच्या ‘आवाज मुंबईकरांचा, संकल्प भाजपचा’ अभियानांतर्गत अभिनेता अक्षय कुमार यांनी दिलेल्या शहरव्यापी स्वच्छता स्पर्धेच्या सूचनेला बीएमसीची मान्यता – आमदार अमीत साटम

बीएमसीच्या स्वच्छता स्पर्धेला ‘मुंबई क्लीन लीग’ असे नाव अभिनेता अक्षय कुमार यांनी दिले; या उपक्रमाचे नेतृत्वही ते करणार – आमदार अमीत साटम

आमदार व भाजपाचे मुंबई अध्यक्ष अमीत साटम यांच्या पुढाकारे उपनगरात होणारा पहिला पुष्पोत्सव

शिवलिंग, हत्ती आणि मोर यांच्या फुलांपासून तयार केलेल्या प्रतिकृती या प्रदर्शनातील खास आकर्षण – आमदार अमीत साटम

मुंबई : दरवर्षी बृहन्मुंबई महानगरपालिकेतर्फे भायखळा येथील वीरमाता जीजाबाई भोसले उद्यान व प्राणीसंग्रहालयामध्ये होणाऱ्या पुष्प महोत्सवाप्रमाणे पहिल्यांदाच मुंबई उपनगरातील अंधेरीतील जुहू येथील पुष्पा नरसी पार्कमध्ये पहिला पुष्पोत्सव आयोजित करण्यात आला आहे. शनिवारी पुष्पोत्सवाचे उद्घाटन पद्मश्री अभिनेते अक्षय कुमार यांनी केले. यावेळी अंधेरी पश्चिमचे आमदार व भाजपचे मुंबई अध्यक्ष अमीत साटम, महानगरपालिकेचे आयुक्त भूषण गगराणी उपस्थित होते. उद्घाटनाला विद्यार्थी आणि स्थानिक नागरिकांनी मोठी गर्दी केली होती.

यासदंर्भात माहिती देताना आमदार अमीत साटम म्हणाले की, गेली २९ वर्षे भायखळा येथील वीरमाता जीजाबाई भोसले उद्यान व प्राणीसंग्रहालयामध्ये पुष्प महोत्सव आयोजित केला जातो. यंदा प्रथमच त्या धर्तीवर उपनगरातही पुष्पोत्सव होत आहे. हा पहिला पुष्पोत्सव अंधेरीमधील जुहू येथे आयोजित करण्यात आला आहे. १४ आणि १५ फेब्रुवारी सकाळी ८ ते रात्री ९ पर्यंत दोन दिवस हा पुष्पोत्सव आहे..

भाजपच्या ‘आवाज मुंबईकरांचा संकल्प भाजपचा’ या मोहिमेच्या अंतर्गत अभिनेते अक्षय कुमार यांनी ‘स्वच्छ मुंबई’ प्रतियोगिता आयोजित करण्याची सूचना केली होती. अक्षय कुमार यांची सूचना महानगरपालिकेने स्वीकारली आहे. मुंबईकरांचा सहभाग असलेली स्वच्छता प्रतियोगिता लवकरच आयोजित केली जाणार आहे. या प्रतियोगितेचे मूल्यमापन तृतीय पक्ष एजन्सी तर्फे करण्यात येईल. यासाठी मुंबई महानगरपालिका लवकरच एजन्सी नियुक्त करणार आहे. ‘मुंबई क्लीन लीग’ असे या प्रतियोगितेचे नाव अभिनेते अक्षय कुमार यांनी दिले असून याचे नेतृत्वही तेच करणार आहेत. मुंबई शहराचे ‘स्वच्छ भारत’ मधील स्थान वरती आणण्याच्या दृष्टिकोनातून या मोहिमेचा उपयोग होईल, असे आमदार अमीत साटम यांनी सांगितले.

स्थानिक नगरसेवक सुधा सिंह, उपायुक्त भाग्यश्री कापसे, प्रभाग अधिकारी चक्रपाणी अल्ले, उद्यान अधिक्षक जितेंद्र परदेशी या उद्घटनाला उपस्थित होते. या पुष्पोत्सवात विविध प्रकारची फुले, रोपे तसेच भाज्या व दुर्मिळ वनस्पती पाहता येतील. या ठिकाणी फूलांपासून तयार केलेली भली मोठी शंकराची पिंडी, हत्ती व मोर या प्रदर्शनातील खास आकर्षण आहे. रविवारी रात्री ९ पर्यंत प्रदर्शन सर्वांना विनामूल्य खुले आहे. बृहन्मुंबई महानगरपालिका, वृक्ष प्राधिकरण, ट्री सीटीज, माझी वसुंधरा या पुष्पोत्सवाचे आयोजक आहेत. महानगरपालिकेच्या के -पश्चिम विभागाने या पुष्पोत्सवासाठी पुढाकार घेतला आहे.