बनावट नोटा पुण्यात कुठे छापल्या जात होत्या? शिवाजीनगर पोलिसांच्या कारवाईनं उघडली नोटा माफियांची गुपित यंत्रणा! २८ लाखांवर बनावट नोटा जप्त !

पुणे : शिवाजीनगरच्या मध्यवर्ती भागात बनावट नोटांचे मोठे रॅकेट उघडकीस आलं आहे. २८ लाखांहून अधिक बनावट नोटा, २ लाखांहून अधिक खऱ्या नोटा आणि अत्याधुनिक नोटा छपाईसाठी वापरलं जाणारं साहित्य पोलिसांनी जप्त केलं आहे. ही संपूर्ण यंत्रणा इतकी व्यावसायिक पद्धतीनं उभी केली गेली होती, की बँकेच्या सीडीएम मशीनलाही हे चलन खऱ्या नोटा समजून स्वीकारत होतं!

१७ एप्रिल रोजी कोटक महिंद्रा बँकेच्या मशीनमध्ये ५५ बनावट २०० रुपयांच्या नोटा सापडल्यानंतर पोलिसांची शंका बळावली आणि सुरू झाला तपास. शिवाजीनगर पोलिसांच्या सायबर पथकाने तांत्रिक विश्लेषण करत मनिषा ठाणेकर, भारती गवंड आणि सचिन यमगर या तिघांना अटक केली. चौकशीत त्यांनी ‘मास्टरमाइंड’ नरेश शेटटीचं नाव उघड केलं.

https://prahaar.in/2025/04/29/blind-love-or-deceit-why-did-136-girls-suddenly-disappear-from-ahilyanagar/

नरेशच्या लोहगाव येथील घरावर छापा टाकताच खळबळजनक माहिती समोर आली. त्याच्या घरी सापडल्या तब्बल २३.३२ लाखांच्या बनावट नोटा – २०० रुपयांचे २० बंडल, ५०० च्या २३२ नोटा, १११६ प्रिंटेड कागद, प्रिंटर, शाई आणि आणखी सगळं साहित्य. एवढंच नाही तर त्याच्या कारमधूनही ६४८ बनावट नोटा आढळल्या.

याशिवाय आरोपी प्रभू गुगलजेडडी यालाही पोलिसांनी अटक केली. संपूर्ण टोळी बनावट नोटा बाजारात पेरण्यासाठी सुसूत्र योजना आखून काम करत होती.

शिवाजीनगर पोलिसांच्या या कारवाईत सुमारे ३० लाखांचा बनावट चलन साठा, छपाई यंत्रणा आणि पाच आरोपींच्या अटकेसह मोठा कट उध्वस्त करण्यात आला आहे.