सदूचा खेळ

एकनाथ आव्हाड

सदूला फारच कंटाळा आला
काय करावे सुचेना त्याला

खेळण्यातले प्राणी घेऊन बसला
त्याला नवा एक खेळ सुचला

माकडाच्या लग्नाची दवंडी पिटवली
सगळ्या प्राण्यांना आमंत्रणं दिली

गाढवासोबत गाढवीण आली
मंगलाष्टके त्यांनी सुरात गायली

हत्तिणीसोबत हत्ती आला डुलत
लग्नात वरातीचं बसला बोलत

वाघ आला वाघीण आली
लग्नात नाचायला सुरुवात झाली

मांजर आली बोका आला
त्यांचा नुसताच पंगतीकडे डोळा

बोकड आला शेळी आली
नवरीला त्यांनी साडीचोळी दिली

गाय आली बैल आला
नवरदेवाला त्यांनी सदरा दिला

उंटासोबत आली सांडणी
आहेर म्हणून आणली मांडणी

सारेच प्राणी जोडीने आले
लग्नात पोटभर जेवून गेले

संपला खेळ सदू हसला
आई म्हणाली बस अभ्यासाला

काव्यकोडी

१) पावसाच्या तालात
तो मनमुराद नाचे
पिसाऱ्यावरील डोळे त्याचे
हिरवे पुस्तक वाचे

डोक्यावरी तुरा
रंगीत पिसारा
नाव याचे सांगायला
घाई करा जरा?

२) गुटर गू करून
साऱ्यांना बोलवतो
शांतीचा संदेश
चहुकडे देतो

पारवा, कपोतही
म्हणतात याला
सांगा या पक्ष्याचे
नाव काय बोला?

३) त्याच्याकडे आहे
मनुष्यवाणी
अवचित दिसतो
तो आपल्या अंगणी

डाळिंबाचे दाणे
आवडीने खातो
पेरूच्या फोडीसाठी
कोण उडत येतो?

eknathavhad23 @gmail.com