मूत्रपिंड प्रत्यारोपणानंतर ससून हॉस्पिटलमध्ये आता यकृत प्रत्यारोपण (लिव्हर ट्रान्सप्लांट) करण्यास परवानगी देण्यासाठी ससून हॉस्पिटल प्रशासनाने आरोग्य खात्याकडे प्रस्ताव पाठविला आहे.
पुणे- मूत्रपिंड प्रत्यारोपणानंतर ससून हॉस्पिटलमध्ये आता यकृत प्रत्यारोपण (लिव्हर ट्रान्सप्लांट) करण्यास परवानगी देण्यासाठी ससून हॉस्पिटल प्रशासनाने आरोग्य खात्याकडे प्रस्ताव पाठविला आहे. त्यामुळे या प्रस्तावाला परवानगी मिळाल्यानंतर ससूनमध्ये यकृताचेही प्रत्यारोपण करणे शक्य होणार आहे. पश्चिम महाराष्ट्रातील गोरगरिबांचे हॉस्पिटल म्हणून ससून हॉस्पिटलकडे पाहिले जाते. या हॉस्पिटलमध्ये विविध उपचारांच्या सुविधा उपलब्ध होण्यास सुरुवात झाली आहे. सध्या अवयव प्रत्यारोपणाची सुविधा मोजक्याच काही खासगी हॉस्पिटलमध्ये उपलब्ध आहे.
शहरातील रुबी हॉस्पिटल, दीनानाथ मंगेशकर, जहांगीर, केईएम, पुना हॉस्पिटल, सह्याद्री, आदित्य बिर्ला हॉस्पिटल अशा मोजक्याच हॉस्पिटलमध्ये अवयव काढणे आणि प्रत्यारोपण करण्याची सुविधा आहे. पुणे परिसरात ससूनसारखे सरकारी मोठे हॉस्पिटल आहे; मात्र त्या ठिकाणी अवयव काढण्याच्या प्रक्रियेलाच परवानगी आहे. परंतु, मूत्रपिंडाशिवाय अन्य अवयव प्रत्यारोपण करण्याची सुविधा अथवा त्याबाबतची रितसर आरोग्य खात्याची परवानगी नाही.
खासगी हॉस्पिटलमध्ये प्रत्यारोपणाच्या सुविधा आहेत. परंतु, त्या सुविधा खर्चिक आणि महागडय़ा असल्याने सर्वानाच त्या परवडत नाहीत. अनेकदा खासगी हॉस्पिटलमध्ये जाण्याशिवाय पर्याय पेशंटसह त्यांच्या नातेवाइकांना पर्याय उरत नाही. त्यामुळे खासगी हॉस्पिटलवर विसंबून राहावे लागते. परिणामी, ससून हॉस्पिटलमध्ये अवयव प्रत्यारोपणाच्या सुविधा उपलब्ध झाल्यास त्याचा नागरिकांना फायदा होणार आहे. कमी खर्चात या सुविधा उपलब्ध होणार असून, ससून हॉस्पिटल प्रशासनाने लिव्हर ट्रान्सप्लांट करण्याचा प्रस्ताव पाठविला आहे.
ससून हॉस्पिटलमध्ये आतापर्यंत मूत्रपिंड प्रत्यारोपण करण्यात आले आहे. तसेच लिव्हर काढण्याची प्रक्रिया देखील दोन तीन वेळा झाली आहे. परंतु, लिव्हर ट्रान्सप्लांट करण्यासाठीची परवानगी आरोग्य खात्याकडून घेणे आवश्यक आहे. त्यामुळे त्याचा प्रस्ताव आरोग्य खात्याकडे पाठविण्यात आला आहे. या प्रस्तावाला अद्याप आरोग्य खात्याकडून हिरवा कंदील दाखविण्यात आला नाही. ससूनमध्ये लिव्हर ट्रान्सप्लांट करण्यासाठी आवश्यक दोन ऑपरेशन थिएटर, तसेच प्रत्यारोपण तज्ज्ञ डॉक्टर उपलब्ध आहेत. त्याशिवाय नवीन इमारतीत काही ऑपरेशन थिएटर उपलब्ध होणार आहे. त्यामुळे परवानगी मिळाल्यास नागरिकांचा फायदा होणार आहे,अशी माहिती हॉस्पिटल प्रशासनातील सूत्रांनी दिली.
[EPSB]
भारनियमनामुळे नागरिकांचा संताप
[/EPSB]