कर्जत तालुक्यातील कुपोषणाचे प्रमाण कमी होत नसून ऐनाची वाडी येथे महिला बालकल्याण विभागाच्या दुर्लक्षामुळे ३ कुपोषित बालके आढळली आहेत.
नेरळ- कर्जत तालुक्यातील कुपोषणाचे प्रमाण कमी होत नसून ऐनाची वाडी येथे महिला बालकल्याण विभागाच्या दुर्लक्षामुळे ३ कुपोषित बालके आढळली आहेत. अंगणवाडी सेविका आणि आरोग्य विभागाच्या आरोग्यसेविकांच्या अनुपस्थितीमुळे कुपोषित बालकांची प्रकृती खालावत चालली आहे. त्यामुळे या तिन्ही कुपोषित बालकांना लोकवर्गणीतून पोषण आहार देण्यासाठी कर्जत तालुका आदिवासी खांडस प्राथमिक आरोग्य केंद्राच्या संघटना सरसावली आहे.
हद्दीतील नांदगाव ग्रामपंचायतीच्या हद्दीत ऐनाची वाडी हा छोटासा पाडा असून तेथील महिला बालकल्याण विभागाच्या वतीने काम करणाऱ्या अंगणवाडी सेविका २०१२ नंतर सेवेत असूनही ऐनाची वाडीतील अंगणवाडीमध्ये फिरकल्या नाहीत. त्यांच्या गरहजेरीत तेथील मदतनीस पोषण आहार बनवून देण्यापासून वाडीमध्ये फिरून बालकांना अंगणवाडीत आणणे आणि त्यांना अंगणवाडीत खिळवून ठेवण्याची कामे करीत आहेत.
या भागातील अंगणवाडी पर्यवेक्षिका आणि कर्जत तालुक्याचे प्रकल्प अधिकारी यांना पाच वर्षात अंगणवाडी सेविका अंगणवाडीत येत नसताना त्यावर कार्यवाही करावी असे वाटत नसल्याने कर्जत तालुका आदिवासी संघटनेने नाराजी व्यक्त केली आहे. या सगळय़ामुळे ऐनाची वाडीतील श्रेयस किरण वाघ, रोहित नाना पादिर आणि ऋषभ नाना पादिर या ३ बालकांना कुपोषणाने ग्रासले असून त्यांची प्रकृती दिवसेंदिवस खालावत आहे.
या गावात शाळेतील बालकांची आरोग्य तपासणी करण्यासाठी आरोग्य उपकेंद्रात आरोग्यसेविका नाहीत, चई या गावी असलेल्या आरोग्य उपकेंद्रात नियुक्तीवर असलेल्या आरोग्य सेविकांना जिल्हा परिषदेने राहण्याची सोय करून दिलेली असूनही त्या सेविका तेथे राहत नसल्याची तक्रार आदिवासी संघटनेने केली आहे.