न्यूयॉर्क – एकाच हॉस्पिटलमध्ये कार्यरत असलेल्या तब्बल १६ नर्स एकाच वेळी गर्भवती असल्याची गमतीशीर गोष्ट समोर आली आहे. अमेरिकेतील अॅरिझोना हॉस्पिटलमध्ये हा प्रकार घडला आहे. सर्व नर्सनी एकत्र फोटोशूट करत आपला आनंद व्यक्त केला.
अॅरिझोनाच्या मेसामधील बॅनर डेझर्ट मेडिकल सेंटरच्या आयसीयूमध्ये या १६ नर्स काम करतात. त्यापैकी बहुतांश जणींची डिलीव्हरी ऑक्टोबर ते जानेवारी या कालावधीत होण्याची शक्यता आहे. प्रेग्नंट असलेल्या नर्सचा एक फेसबुक ग्रुप आम्ही तयार केला. त्यानंतर एकामागून एक जण अॅड होत गेली आणि आपण १६ जणी एकाच वेळी गर्भवती असल्याचे आमच्या लक्षात आले, असे आठ महिन्यांची गरोदर असलेली नर्स रोशेल हिने सांगितले.
एकाच वेळी १६ प्रेग्नंट नर्स पाहून हॉस्पिटलमध्ये येणारे रुग्ण आणि त्यांचे नातेवाईकही आश्चर्यचकित होतात. सर्व जणी मॅटर्निटी लीव्हवर गेल्यानंतर बदली नर्सची भरती करणार असल्याचे रुग्णालय प्रशासनाने सांगितले. या परिचारिका खाण्या-पिण्यासाठी रुग्णालयाच्या कॅफेटेरियावरच अवलंबून आहेत, पण तिथे त्यांचे व्यवस्थित डोहाळे पुरवले जात आहेत, असेही रुग्णालयातर्फे सांगण्यात आले.