नवी मुंबई महापालिका महापौरपदाच्या निवडणुकीत राष्ट्रवादीचे सुधाकर सोनावणे यांनी शिवसेनेचे संजू वाडे यांचा २३ मतांनी पराभव करून विजय संपादन केला.
नवी मुंबई- नवी मुंबई महापालिका महापौरपदाच्या निवडणुकीत राष्ट्रवादीचे सुधाकर सोनावणे यांनी शिवसेनेचे संजू वाडे यांचा २३ मतांनी पराभव करून विजय संपादन केला. सोनावणे यांना ६७ तर वाडे यांना ४४ मते मिळाली. त्याचप्रमाणे उपमहापौरपदाच्या निवडणुकीत भाजपाच्या उज्ज्वला झंजाड यांना ४४, तर काँग्रेसचे अविनाश लाड यांना ६७ मते मिळाली. विरोधीपक्ष नेतेपदी शिवसेनेचे विजय चौगुले, तर सभागृह नेतेपदी राष्ट्रवादीचे जयवंत सुतार यांची निवड करण्यात आली.
स्थायी समितीच्या १६ जागांवर विविध राजकीय पक्षांनी त्यांच्या उमेदवारांची यादी महापौरांकडे सादर केली. यात राष्ट्रवादी शंकर मोरे, सुरेश कुलकर्णी, विनोद म्हात्रे, नेत्रा शिर्के, रवींद्र इथापे, अपर्णा गवते, शशिकांत राऊत व जयवंत सुतार, शिवसेनेचे मनोहर मढवी, शिवराम पाटील, कोमल वास्कर, भारती कोळी, काशीनाथ पवार, जगदीश गवते, भाजपाचे रामचंद्र घरत तर काँग्रेसच्या रूपाली भगत यांची स्थायी समितीवर नियुक्ती करण्यात आली.
स्वीकृत नगरसेवक पदासाठी ५ जागा असताना सर्व पक्षांनी त्यांच्या संख्याबळानुसार सदस्यांची यादी देणे अपेक्षित असताना त्यांनी अपेक्षेपेक्षा अधिक सदस्यांची यादी दिली. त्यामुळे महापौर सोनावणे यांनी या संदर्भात आयुक्तांनी पुढील बैठकीत सर्वपक्षीयांची बैठक घेऊन निर्णय द्यावा, असे सांगितले.
दरम्यान महापौरपदाच्या निवडणुकीच्या वेळी वाडे यांनी सोनावणे यांच्या उमेदवारीला आक्षेप घेतला होता. या वेळी त्यांनी सर्वोच्च न्यायालयाच्या काही याचिकांचा दाखला देत महापौरपद हे अनुसूचित जातीसाठी राखीव असताना सोनावणे यांनी खुल्या प्रवर्गातून निवडणूक लढवली आहे. त्यामुळे ते महापौरपदासाठी पात्र नसल्याने दुसरा उमेदवार म्हणून आपणास विजयी घोषित करावे, अशी मागणी वाडे यांनी केली. त्यावर निवडणूक अधिकारी सुमंत भांगे यांनी या याचिकांच्या निर्णयाचा अभ्यास करून बीएमसी कायद्यानुसार महापौरपदासाठीचा उमेदवार कोणत्याही प्रवर्गातून निवडून आला, तरी तो अनुसूचित जातीचा असल्याने या पदासाठी पात्र असल्याचा निर्णय दिला. त्यानंतर ही निवडणूक प्रक्रिया होऊन सोनावणे विजयी झाले.
मात्र असे असले, तरी निवडणूक अधिका-यांचा याबाबतचा निर्णय योग्य नसून या प्रकरणी आपण सर्वोच्च न्यायालयात जाणार असल्याची संजू वाडे यांनी सांगितले.
स्वीकृत नगरसेवक निवडणूक पुढे ढकलली
महापौरपदी राष्ट्रवादीचे सुधाकर सोनावणे विराजमान झाल्यावर स्थायी समिती सदस्य निवडून मासिक सभा आटोपती घेतली. या निवडणुकीत शिवसेनेने सुरुवातीपासून आक्रमक भूमिका घेत आगामी राजकारणाची नांदी दाखविली आहे.
महापौर सुधाकर सोनावणे हे अनुसूचित जातीचे असले तरी ते खुल्या प्रभागामधून निवडून आले आहेत. तरीही या निवडीवर शिवसेनेचे महापौरपदाचे उमेदवार संजू वाडे यांनी आक्षेप घेतल्याने निवडणुकीत काही वेळ चुरस निर्माण झाली होती. मात्र निवडणूक निर्णय अधिकारी सुमंत भांगे यांनी न्यायालयाने दिलेल्या एका निकालाचा आधारावर हा आक्षेप फेटाळून लावला.
यावेळी स्वीकृत नगरसेवक पदासाठी निवड होणे अपेक्षित होते. मात्र पाच जागांसाठी सुमारे दहा उमेदवारी अर्ज आल्याने ही निवडणूक पुढे ढकलली. आता याबाबत सत्ताधारी पक्षाने निर्णय घ्यायचा आहे, अशी माहिती आयुक्त दिनेश वाघमारे यांनी दिली आहे. आगामी मासिक सभेत प्रभाग समिती परिवहन समिती शिक्षण मंडळ स्थायी समिती सभापती आणि स्वीकृत नगरसेवक निवडले जाणार आहेत.
शिवसेनेच्या वतीने मनोज हळदणकर, राजेंद्र आव्हाड, राजेश िशदे आणि विसाजी लोके यांनी अर्ज दाखल केले असून काँग्रेसचे अनिल कौशिक यांनी अर्ज दाखल केला. राष्ट्रवादीच्या वतीने अनंत सुतार, साबू डॅनियल, सुरज पाटील आणि घन:श्याम मढवी यांनी अर्ज दाखल केले.
शिवसेनेचे विसाजी लोके आणि राजेश शिंदे यांना माघार घ्यायला लावून राजेंद्र आव्हाड आणि मनोज हळदणकर यांची वर्णी लावली जाणार आहे. राष्ट्रवादीचे अनंत सुतार साबू डॅनियल आणि घन:श्याम मढवी यांची वर्णी लागण्याची शक्यता आहे. आता पुढील मासिक सभेच्या वेळी स्वीकृत नगरसेवक निवडले जातील.
अपक्ष म्हणून निवडून आलेले महापौर सुधाकर सोनवणे हे मूळचे आरपीआय पक्षाचे असल्याने त्यांनी आरपीआय नेते रामदास आठवले यांच्या भेटीसाठी वांद्रे गाठल्याचा दावा आरपीआय जिल्हाध्यक्ष सिद्राम ओव्हळ यांनी केला आहे.
