‘व्हॅलेंटाईन डे’च्या दिवशी जन्मलेली.. आरसपानी सौंदर्य लाभलेली.. ‘ती पाहताच बाला कलिजा खलास झाला’ या वर्णनात चपखल बसणारी एकमेव सौंदर्यमूर्ती मधुबाला.. पिढय़ान्पिढय़ा तिच्या सौंदर्याचे, सहजसुंदर अभिनयाचे गोडवे गायले तरी ते कमीच पडावेत, अशा या अजरामर सौंदर्यवतीच्या अद्भुत व्यक्तिमत्त्वाचे जतन आता दिल्लीतील मादाम तुस्सा वॅक्स म्युझियमच्या माध्यमातून करण्यात येणार आहे. मृत्यूनंतर अनेक दशकांनतरही जिच्या चाहत्यांमध्ये वाढच होत आहे, आजही जिचे सौंदर्य अवलोकन करताना प्रत्येकाला आपल्या हृदयावर हात ठेवावा लागत आहे, अशा अजरामर सौंदर्याचे प्रतीक मादाम तुस्सामध्ये साकारण्यात येणार आहे.
या वॅक्स म्युझियममध्ये स्वरसम्राज्ञी सदाबहार गायिका आशा भोसले यांचा मेणाचा पुतळा स्थानापन्न करण्याचे काम सुरू झाले आहे. आता मधुबालाचा मेणाचा पुतळा तेथे विराजमान केला जाणार आहे. यापूर्वी अमिताभ बच्चन, ऐश्वर्या रॉय, सचिन तेंडुलकर, लता मंगेशकर यांना हा सन्मान मिळाला आहे. मधुबालाने दिलीपकुमार, किशोरकुमार यांच्यासमवेत अनेक कलाकृती हिंदी सिनेमाला दिल्या आहेत. मात्र या सर्वात अजरामर ठरली ती सलीम अनारकलीची प्रेमकहाणी, अर्थातच मुगल-ए-आझम. वॅक्स म्युझियममध्येही मधुबालाच्या अनारकली रूपातील पुतळा साकारला जाणार आहे. मधुबालाने साकारलेली अनारकली केवळ अप्रतिम.. सलीमला भेटण्याकरिता व्याकुळ झालेली, मिळालेली शिक्षा सहन करताना तिच्यातला करारी बाणा.. शब्दांत व्यक्त करताच येणार नाही.
भारतीय क्लासिक सिनेमाला एका उंचीवर नेण्याचे काम करणा-या पिढीचे प्रतिनिधित्व करणा-या मधुबालाला तिच्या मृत्यूनंतर मिळालेले हे स्थान दखलपात्र असले तरी ते खूप उशिराने मिळाले, असे वाटते. तरीही तिचीच निवड झाली हाही सन्मान नसे थोडका. १९५२ मध्ये एका अमेरिकन मॅगझिनमध्ये तिचे मुखपृष्ठ अन् तिची कथा छापून आल्यानंतर जगभरात तिच्या सौंदर्याची चर्चा झाली होती आणि तिच्या चाहत्यांची संख्याही वाढली होती. २००८ मध्ये भारत सरकारने तिच्या गौरवार्थ पोस्टाचे तिकीट प्रसिद्ध केले होते. मधुबालाच्या सौंदर्याला दु:खाची, विरहाची, एकटेपणाची किनार होती. कदाचित म्हणूनच ती अधिक सुंदर दिसायची. म्हणतात ना, प्रत्येक परीला एक शाप असतोच. तिची गाथाही अशीच शापित, तरीही आपलीशी.