फॉलिक अॅसिडमुळे शरीराची चयापचय क्रिया सुधारते. रक्ताचं प्रमाण वाढतं. शरीरातील लोहाचं प्रमाण कमी होत नाही. म्हणूनच फॉलिक अॅसिडचं प्रमाण असणारे गाजर, बीट, मुळा आणि त्याची हिरवी पानं, कोबी हे पदार्थ खावेत, असं आहारतज्ज्ञांचं म्हणणं आहे. ब-९ हे जीवनसत्त्व ‘फॉलिक अॅसिड’ या नावानेही ओळखलं जातं. गरोदर स्त्रिया, वाढती बाळं यांना फॉलिक अॅसिडची गरज असते. फॉलिक अॅसिडमुळे पोटाचं आरोग्य सुधारतं.
जीवनसत्त्व ‘ब-९’ हे ‘फॉलिक अॅसिड’, ‘फॉलिनिक अॅसिड’, ‘फॉलॅसिन’, ‘टेरॉल’, ‘ग्लुटॅमिक अॅसिड’ आणि ‘जीवनसत्त्व एम’ या नावाने ओळखलं जातं. प्रत्येक प्रौढ व्यक्तीस प्रत्येक दिवसाला २०० मायक्रोग्रॅम इतकी ‘ब-९’ या जीवनसत्त्वाची गरज असते. सल्फॉनामाइड या प्रकारतील अॅलोपॅथिक औषध योजनेमुळे जीवनसत्त्व ब-९ हे शरीरातून साफ नष्ट होतं. त्याचा परिणाम पेशी विभाजनावर होतो. या जीवनसत्त्वाच्या कमतरतेमुळे शरीरातील पांढऱ्या पेशीत जबरदस्त घट निर्माण होते. त्यातून ‘लुकोपेनिआ’ हा आजार निर्माण होतो. पंडुरोग (अॅनिमिया), अस्थिमज्जाचे विकारही होतात. पोटाचे विकार डोकं वर काढतात. हिमोग्लोबिनचे प्रमाण घटतं. ‘ब-९’ जीवनसत्त्व पुढील अन्नपदार्थातून मिळेल.
‘ब-९’ जीवनसत्त्व देणारे अन्नपदार्थ
फळं – संत्री, बदाम, केळी, सफरचंद, नारळ (नारळ खाण्यास घाबरू नका. नारळाचं दूध पिण्यास घाबरू नका. सोलकढी पिण्यास घाबरू नका. नारळामुळे हृदयविकार होतो असा परदेशातील लोकांचा बनावटी प्रचार आहे. मात्र खाण्याचा अतिरेक नको.)
पेयं, सरबतं – दूध आणि त्यापासूनचे पदार्थ, गाजर, बीट, कोबी, मुळा, लेटय़ूस, टोमॅटो, नारळाचं दूध.
सूप आणि भाज्या – गाजर, बीट, मुळा आणि त्याची हिरवी पानं, कोबी, पालक, ब्रोकोली आणि माठ.
कोशिंबिरी – गाजर, मुळा, सॅलडची आणि लेटय़ूसची हिरवी पानं (चायनीज भाजी), बीट, फरसबी.
तेलं – गहू तूस तेल, गव्हांकुरांचं तेल.
चटणी – कढीपत्ता, टोमॅटो.
कच्चे, शिजवून, भाजून आणि उकडून खाण्यायोग्य पदार्थ – यीस्टचे प्रकार, हिरव्या भाज्या, तांदूळ, गहू, गव्हांकुर, वाफवलेल्या डाळी, मका, शेंगदाणे, भेंडी, मसूर.