नवी मुंबईतील ट्रान्सहार्बर मार्गावरील वाशी, नेरुळ, रबाळे, ऐरोली रेल्वे स्थानकांसह सीबीडी येथील कोकण भवन उडवून देण्याची धमकी निनावी पत्राद्वारे नवी मुंबईचे महापौर सुधाकर सोनावणे यांना आल्याने खळबळ उडाली आहे.
नवी मुंबई – नवी मुंबईतील ट्रान्सहार्बर मार्गावरील वाशी, नेरुळ, रबाळे, ऐरोली रेल्वे स्थानकांसह सीबीडी येथील कोकण भवन उडवून देण्याची धमकी निनावी पत्राद्वारे नवी मुंबईचे महापौर सुधाकर सोनावणे यांना आल्याने खळबळ उडाली आहे. यामध्ये एक कोटी रुपयांची मागणी देखिल करण्यात आली आहे. पोस्टाने आलेल्या पत्राबाबत पोलीस तपास करत आहेत.
या पत्रानंतर नवी मुंबई पोलीस आयुक्तांनी सर्व पोलीस ठाणी तसेच संबंधित रेल्वे स्थानकांचे व्यवस्थापक व रेल्वे पोलिसांनाही सतर्क राहण्याचा इशारा दिला आहे. अत्यंत जहाल भाषेत लिहिलेले हे पत्र महापौर सोनावणे यांना शुक्रवारी मिळाले. संपूर्ण नवी मुंबई शहरात विध्वंस घडवण्याची धमकी यातून देण्यात आली आहे.
पत्राचे गांभीर्य लक्षात घेऊन महापौरांनी तातडीने पोलिसांना ही माहिती दिली. पोलिसांच्या विशेष शाखेकडून ही माहिती परिमंडळ १ चे पोलीस उपायुक्त शहाजी उमप यांना मिळाल्यानंतर त्यांनी तातडीने सर्व पोलीस ठाण्यांना पत्र पाठवून सतर्क राहण्याची सूचना दिली.
तसेच सर्व रेल्वे स्थानके आणि कोकण भवन इमारतीची तपासणी करून कडक बंदोबस्त ठेवण्यास सांगितले. पोलिसांनी श्वानपथकाच्या मदतीने रेल्वे स्थानकांची तपासणी केल्यानंतर कोणतीही संशयास्पद वस्तू आढळून आली नाही. मात्र, खबरदारी म्हणून पोलीस बंदोबस्त ठेवण्यात येणार असल्याचे विशेष शाखेचे पोलीस उपायुक्त सुरेश मेंगडे यांनी सांगितले.
नवी मुंबईतील रेल्वे स्थानके आणि कोकण भवनची इमारत उडवून देण्याच्या धमकीचे पत्र मिळाल्यानंतर सिडको महामंडळाच्या सीबीडी आणि इतर ठिकाणच्या सुरक्षा व्यवस्थेत वाढ करण्यात आली आहे