माव्हरं म्हणताच मालवण्यांच्या तोंडाला पाणी नाही सुटलं तर नवलच. कोंबडी-वडे, सुकट म्हणजे कोकणी लोकांचा जीव की प्राण. कोकणी माणसांना मांसाहार जास्त प्रिय आहे. मात्र मुंबईत कामासाठी वास्तव्यास असलेले कोकणी- मालवणी लोक मात्र या चवीला मुकतात. अशा लोकांना खास गावची आठवण करून देणारा बोरिवलीतील ‘कोंकण कुबेरा’ म्हणजे एक पर्वणीच ठरत आहे.
मुंबईत रस्तोरस्ती चायनीजच्या गाडय़ा उभ्या राहिलेल्या आहेत. त्यामुळे अस्सल मालवणी, कोकणी गावचा तडका खायला मिळणं जरा कठीणच आहे. माव्हरं म्हणताच मालवण्यांच्या तोंडाला पाणी नाही सुटलं तर नवलच. कोंबडी-वडे, सुकट म्हणजे कोकणी लोकांचा जीव की प्राण. पण मुंबईत चायनीजच्या दुनियेत हे अस्सल पदार्थ घरच्या चवीनुसार खायला मिळण्यासाठी प्रचंड शोधाशोध करावी लागते.
मुंबईकरांची हीच धावपळ गोव्यातील मूळ रहिवासी असलेले फातरफेकर कुटुंबीयांनी लक्षात घेऊन दीड वर्षापूर्वी कोंकण कुबेरा चालू करण्याचा निर्णय घेतला. बोरिवली स्थानकापासून पूर्वेला वेस्टर्न एक्स्प्रेस हायवेवर गेलं की पुलाच्या अगदी डाव्या हातालाच असलेल्या एन. एक्स मॉलमध्ये शिरताच दृष्टिपथास येतं ते कोंकण कुबेरा. या हॉटेलचं उद्घाटनही महेश लंच होमचे मालक रघू शेट्टी यांनी केल्याने या हॉटेलसाठी खवय्यांची जास्त गर्दी असते.
कोंकण कुबेरा अस्सल खवय्यांना खाण्यासाठीचं कुबेरच आहे. कोकणाला सागरी किनारपट्टी लागल्याने कोकणी माणसांना मांसाहार जास्त प्रिय आहे. त्यातही सागरी पदार्थाशी त्यांची जवळची नाळ जोडली गेली आहे. त्यामुळे मुंबईत कामासाठी वास्तव्यास असलेल्या कोकणी-मालवणी लोकांना गावची आठवण करून देणारा कोंकण कुबेरा ही एक पर्वणीच ठरेल.
हॉटेलचे मालक मूळचे गोव्याचे आणि हॉटेल मॅनेजमेंटचे शिक्षण घेतलेले असल्यामुळे खवय्यांच्या जिभेवर कसं उतरावं याची त्यांना उत्तम जाण आहे. त्यांच्या हॉटेलमध्ये शिरताच याची प्रचिती येते. शिक्षण पूर्ण झाल्यावर काही दिवस त्यांनी गोव्यातील फोर स्टार हॉटेलमध्ये काम केल्यामुळे तिकडचा उत्तम अनुभव त्यांच्या गाठीशी आहे आणि या अनुभवाचाच फायदा घेऊन त्यांनी आपल्या हॉटेलचाही उदय केला. मॉलच्या एका गाळ्यापासून सुरुवात केलेल्या या हॉटेलचा विस्तार वाढत गेला आणि आता तीन गाळ्यांचे प्रशस्त हॉटेल उदयाला आलं आहे.
पदार्थाच्या चवींविषयी विचारल्यावर ते म्हणाले की, ‘पदार्थासाठी वापरण्यात येणारे मसाले हे खास घरगुती बनवलेले असतात. कोणत्याही प्रकारचे केमिकल अथवा रंग न टाकता हे मसाले बनवले जातात.’ या हॉटेलचे केअर टेकर सागर फातरफेकर यांचीच आई मसाला बनवत असल्याचे कळले. त्यांची आई गावाला मसाला करून ठेवते. ते गावी गेल्यावर न चुकता तो मसाला आणून ठेवतात. त्यामुळे येथील पदार्थाना जरा वेगळाच घमघमाट असतो. शिवाय अस्सल झणझणीत पदार्थाचं हे माहेरघर समजण्यासही काहीच हरकत नाही. पदार्थाना गोडी किंवा रुचकरपणा त्यात असणा-या मसाल्यांमुळे येत असतो त्यामुळे यशामागचे सगळं श्रेय मसाल्यांना जातं.
स्वच्छतेच्या दृष्टीने विचार करायचा झालाच तर हॉटेलचं किचन हे अवाढव्य असणं गरजेच असतं पण मुंबईतील अपु-या जागेमुळे तसं असणं शक्य नाही म्हणून त्यांनी छोटय़ाशा जागेतही स्वच्छ किचनची रचना केलेली दिसते. साधारणत: कोणत्याही हॉटेलचे किचन हे ग्राहकांच्या पडद्याआड असतं पण इथे मात्र ओपन किचन नसलं तरी खवय्यांना सहज दिसेल असं बैठकीच्या मागच्याच बाजूसच केलं आहे.
शिवाय शेफची स्वच्छताही केअर टेकर यांच्याकडून जपली गेल्याचं दिसतं. हॉटेलचे केअर टेकर हे गोव्यातील मूळ रहिवासी असल्याने तेथील हॉटेलच्या नियमांविषयी त्यांना चांगलीच जाण आहे त्यामुळे त्यांनी तीच स्वच्छतेची परंपरा जपण्याचा पुरेपूर प्रयत्न केलेला दिसतो.
कोंकण कुबेराचा खजिना फक्त कोकणी मालवणी पुरताच मर्यादित नसून कोल्हापुरी, नागपुरी खवय्यांसाठीही आहे. शिवाय तेथील नॉन महाराष्ट्रीय निवासीचींही चलती असते. गुजराती लोकांनाही या मालवणी तडक्याची चव लागल्याचे सागर सांगतात. तरुणांना आवडणारं चायनीज इथे मिळत असलं तरी तरुणांना हॉटेलचे केअर टेकर मालवणी-कोकणी पदार्थाची चव घेण्याचा आग्रह करतात. त्यामुळे तरुणांनाही आता अस्सल मांसाहारी तडक्यांची चव आवडू लागली आहे.
तरुणांच्या जिभेवर आपल्या खाद्य संस्कृतीची चव रुजावी हाच हॉटेलचा प्रयत्न आहे. शिवाय खास फूड मार्केटिंग करत असलेले झोमेटोमध्येही हॉटेलची नोंद असल्याने तरुण खवय्ये आवर्जून त्यांच्या कॉमेन्टस पाठवतात. हे हॉटेल मॉलमध्येच असल्याने थिएटरमध्ये सिनेमा बघण्यासाठी येणा-यांचे पाय आपोआपच या कोंकण कुबेरामध्ये वळतात.
कोंकण कुबेरामध्ये लहान मुलांसाठी करंजी चिकन आणि प्रॉन्स मोदक, चिकन खिमा तर मांसाहारी स्टार्टरमध्ये कोल्हापुरी सुखा, मालवणी सुखा, मालवणी फ्राय, कोकण कुबेरा स्पेशल फ्राय, हरयाली फ्राय, थालीपीठ चिकन खिमा व मटण खिमा तर शाकाहारी स्टार्टरमध्ये कॉर्नवडी, आळूवडी, कोंथिबीर वडी हे पदार्थ मिळतात. शिवाय खास महाराष्ट्रीय वरणाचे काही विविध प्रकारही आपल्याला चाखायला मिळतील.
अस्सल मांसाहरी तडक्यामध्ये कोंकण करी, सी फूडमध्ये सुरमयी, रावस, पापलेट, तिस-या मसाला, कोळीवाडा प्राँस, फीश फिंगर्स यांचा आस्वाद घेऊ शकतो. तर कोल्हापुरी तांबडा रस्सा, पांढरा रस्साही येथे मिळतो. इथलं ग्रीन पीस पालक सूप, टोमॅटो सार, चिकन/मटण सूपसुद्धा येथे प्रसिद्ध आहे. शाकाहारी खवय्येदेखील येथून पोट भरून जेवून जातील अशी सोय येथे करण्यात आली आहे. त्यांच्यासाठी खास महाराष्ट्रीय डिश, क्रिस्पी भेंडी, पनीर करंजी, थालीपीठ, साबुदाणा वडा, फ्रेंच फ्राईस या पदार्थाची आरास केली जाते.
सध्या अनेकांच्या आवडीचं झालेलं कँडल लाईट डिनरची सोयही येथे झक्कासपणे केली जाते. नवीन जोडपी किंवा पार्टीसाठी कँडल लाईट डिनरची व्यवस्था बुधवार व शनिवारी केली जाते. सध्या कँडल लाईट डिनरला जगभरात प्रचंड मागणी असल्याने या हॉटेलनेही आपल्या वास्तूत कँडल लाईट डिनरची सोय करत ग्राहकांना आकर्षित करण्याचा प्रयत्न केला आहे.
शिवाय येथे पार्टीचीही व्यवस्था करण्यात येत असल्याने त्यासाठी पूर्व नोंदणी करणं गरजेचं असतं. काही कार्यक्रमानिमित्तही येथे पूर्व नोंदणी करून लोक पार्टीसाठी येतात. पार्टीसाठी आलेल्यांना सुंदर, शांत संगीतासोबत पार्टीचा आनंद घेता येतो.
कोंकण कुबेराच्या स्वादामुळे लोकांनीच त्यांच्या पदार्थाची काही शॉर्टकट नावे ठेवली आहेत. म्हणजे के. के. मसाला फ्राय, के. के. करी अशी. के. के. म्हणजेच कोंकण कुबेरा. या नावांमुळे लोक पार्सल मागतानाही याच नावांचा उल्लेख करतात.
हॉटेलच्या केअर टेकरशी बोलताना असं कळलं की बोरिवली पश्चिमेला राहणारे एक गृहस्थ तिकडची हॉटेल्स सोडून खास याच हॉटेलमधून पार्सल घेऊन जातात. कारण त्यांच्या आईला या हॉटेलची चव म्हणजे गावचं जेवण जेवल्यासारखं वाटतं. एखाद्या शेफसाठी यापेक्षा मोठी पावती अजून काय असेल?
गेल्या वर्षी खास श्रावण महिन्यात उपवासधारकांसाठी काही स्पेशल पदार्थाची मेजवानी केली गेली होती. लोकांनीच या खास श्रावण पदार्थाना फूड फेस्टिवल असं नाव दिलं आहे. त्यामुळे नुकताच श्रावण येऊन ठेपला असल्याकारणानं खवय्यांकडून फूड फेस्टिवलबाबत उत्सुकता लागून राहिली आहे. अशा वैविध्यपूर्ण पदार्थानी सजलेल्या कोंकण कुबेराने मुंबईतील कोंकणी मालवणी लोंकाच्या जिभेवर अस्सल झणझणीत तडक्यांची खास चव जपून ठेवली आहे.
