जगज्जेता विश्वनाथन आनंद आणि आव्हानवीर अव्वल मानांकित नॉर्वेचा मॅग्नस कार्लसन यांच्यातील दुसरा डावही रविवारी २५ चालींमध्ये बरोबरीत संपला. 
चेन्नई- जगज्जेता विश्वनाथन आनंद आणि आव्हानवीर अव्वल मानांकित नॉर्वेचा मॅग्नस कार्लसन यांच्यातील जगज्जेतेपदाच्या लढतीतील दुसरा डावही रविवारी २५ चालींमध्ये बरोबरीत संपला. या बरोबरीमुळे दोन डावांनंतर दोघांचा प्रत्येकी एक गुण झाला आहे. या लढतीत एका क्षणी निकाल लागण्याची चिन्हे होती. मात्र आनंदने बचावात्मक पवित्रा घेत पुन्हा एकदा कार्लसनला बरोबरीसाठी भाग पाडले.
कार्लसनचा प्रथमच क्लासिकल कारो-कान डिफेन्सचा अवलंब
आनंदचे किंग पॉन ओपनिंग झाल्यावर त्याला कार्लसनने कारो-कान या अनपेक्षित डिफेन्सद्वारे प्रत्युत्तर दिले. कदाचित आनंद e4 द्वारे ओपनिंग करणार, हे कार्लसनला अपेक्षित असावे. कार्लसनने याआधी कधीही क्लासिकल कारो-कान डिफेन्सचा अवलंब केलेला नाही. अनातोली कारपॉव हे अनेक वेळा गॅरी कास्पॉरॉव यांच्याविरुद्ध या पद्धतीने सुरुवात करत असत.
कार्लसनने सुरुवातीला आश्चर्यचकित केले असले तरी आनंद दडपणाखाली आला नाही. दोघांनीही पहिल्या १२ मिनिटांत १३ चाली खेळत वेगवान खेळ केला. त्यातच १४व्या चालीला दोघांनी कॅसलिंग केले. यावेळी कार्लसनने किंगसाइडला केलेल्या कासलिंगची चाल आनंदला जवळपास १५ मिनिटे विचार करायला लावणारी ठरली. मात्र आनंदने त्याच वेळी कार्लसनचा घोडा मारत दडपण दूर केले. पाठोपाठ कार्लसननेही आनंदचा घोडा मारला. मात्र पाठोपाठ १७व्या चालीला आनंदने वजिरावजिरी करण्यासाठी कार्लसनला भाग पाडले. त्यावेळीच बरोबरीची चिन्हे दिसू लागली होती. मात्र पटावरील स्थिती पाहता आनंदला सावध राहणे, गरजेचे दिसत होते. कारण कार्लसनच्या राजाभोवती ब-याच प्यादांचे संरक्षण होते.
मात्र पुन्हा १९व्या चालीला आनंदने प्यादे कार्लसनच्या दिशेने पुढे सरकवल्यावर बरोबरी ठळकपणे दिसू लागली. कारण त्यावेळी कार्लसनलाही आक्रमण करण्याची स्थिती पटावर दिसत नव्हती. अखेर शनिवारप्रमाणेच दोघांनी तीन चालींची पुनरावृत्ती केल्यावर नियमाप्रमाणे बरोबरी मान्य करण्यात आली. यावेळी आनंदने हत्तीची आणि कार्लसनने राजाच्या हलवण्याच्या चालींची पुनरावृत्ती केली. कार्लसनने त्याच्या चाली अवघ्या २५ मिनिटांत रचल्या तर आनंदने त्याच्या चाली खेळण्यासाठी ४२ मिनिटे घेतली.
सोमवारी विश्रांती
सुरुवातीच्या दोन डावांनंतर सोमवार (११ नोव्हेंबर) हा लढतीत विश्रांतीचा दिवस आहे. तिस-या डावात मंगळवारी (१२ नोव्हेंबर) आनंद पुन्हा काळ्या मोह-यांनी सुरुवात करेल.
बचावात्मक पवित्रा घेतल्याबद्दल आनंदची दिलगिरी
दुस-या डावात बचावात्मक पवित्रा घेतल्याबद्दल आनंदने पत्रकार परिषदेत दिलगिरी व्यक्त केली. ‘‘बचावात्मक पवित्रा घेतल्याबद्दल दिलगिरी व्यक्त करतो. मात्र कारो अ‍ॅन डिफेन्सविरुद्ध खेळताना जास्त धोका पत्करणे, योग्य नव्हते. त्यातच कार्लसन त्या पद्धतीचा अवलंब करेल, हे अपेक्षित नव्हते. १२व्या चालीनंतर पुढील काही चाली खेळायला मला वेळ लागला.
कारण परिस्थिती दडपण आणणारी होती. त्यातच वजिरावजिरीनंतर निकालाची अपेक्षा करता येणार नाही, हेही निश्चित झाले. पहिले दोन डाव कमी वेळेचे ठरले. कारण दोघांनाही एकमेकांकडून अनपेक्षित चालींना सामोरे जावे लागले आहे. मात्र पुढील डावांमध्ये खेळाची रंगत वाढत जाईल,’’ असे आनंदने सांगितले.
सावध सुरुवातीबाबत कार्लसन समाधानी
सावध सुरुवातीबाबत कार्लसनने समाधान व्यक्त केले आहे. ‘‘ब-याच स्पर्धामध्ये माझी जशी सुरुवात होते, तशीच येथेही झाली. काळी मोहरी घेऊन मला आनंदला बरोबरीत रोखता आले. आता पुढील डावांबद्दल आताच बोलणे कठीण आहे,’’ असे सांगत कार्लसनने काही प्रश्नांचे उत्तर देणे टाळले. आता सोमवार विश्रांतीचा दिवस असल्याने कार्लसनने अन्य काही तरी खेळ खेळून स्वत:ला ‘रिलॅक्स’ करण्याचा प्रयत्न करेन, असेही त्याने म्हटले.
एकमेकांचे खडतर प्रतिस्पर्धी
एकमेकांना खडतर प्रतिस्पर्धी मानता का, असा प्रश्न विचारण्यात आला असताना दोघांनीही ते मान्य केले. ‘‘कार्लसन गेली काही वर्षे सातत्याने चांगली कामगिरी करत आहे. सध्याच्या घडीला तो माझा कट्टर प्रतिस्पर्धी आहे,’’ असे आनंदने म्हटले. ‘‘आनंदचा जगज्जेतेपदाच्या लढतीतील अनुभव मोठा आहे. याआधीही मी त्याच्याविरुद्ध अनेकदा खेळलो आहे. सध्या मी त्याला माझा अव्वल प्रतिस्पर्धी मानतो,’’ असे कार्लसनने म्हटले.
बुद्धिबळाला मिळणा-या वाढत्या प्रसिद्धीने कार्लसनची बहीण प्रभावित
भारतात बुद्धिबळाला मिळणारी प्रसिद्धी पाहून कार्लसनची बहीण एलिन कार्लसन प्रभावित झाली आहे. भारतातील जास्त करून चेन्नईतील आघाडीच्या दैनिकांमध्ये कार्लसन आणि आनंद यांच्यातील जगज्जेतेपदाच्या लढतीला मोठी प्रसिद्धी मिळत असल्याचा ‘ट्विट’ तिने केला आहे. जगज्जेतेपदाच्या लढतीसाठी कार्लसन त्याच्या तीन बहिणींसमवेत भारतात आला आहे.
दुसरा डाव
QbÀfSXf OXfU 1. e4 c6 2. d4 d5 3. Nc3 dxe4 4. Nxe4 Bf5 5. Ng3 Bg6 6.h4h6 7Nf3 e6 8.Ne5 Bh7 9.Bd3 Bxd3 10.Qxd3 Nd7 11.f4 Bd4+ 12. c3 Be7 13. Bd2 Ngf6 14. 0-0 0-0 15. Ne4 Nxe4 16.Qxe4 Nxe5 17.fxe5 Qd5 18. Qxd5 cxd5 19.h5 b5 20. Rh3 a5 21. Rf1 Rac8 22. Rg3 Kh7 23. Rgf3 Kg8 24. Rg3 Kh7 25. Rgf3.
