कुठे नववारी साडीची खरेदी, तर कुठे ती वेळेत शिवून घेण्याची धडपड, दुसरीकडे कोणी शोधतंय पारंपरिक दागिने, तर कोणी घासूनपुसून चमकवतंय बाईक. बाकी ग्रुप्समध्ये अजूनही नक्की काय करायचं याचे बेत आखले जातायत. पण तरुणाईमध्ये ही लगबग नक्की आहे तरी कसली..? तर हा सारा खटाटोप चाललाय तो ‘न्यू इअरसाठी’.. म्हणजेच गुढीपाडव्यासाठी.
परवा आहे न्यू इअर.. सॉरी.. शुद्ध मराठीत म्हणायचं तर गुढीपाडवा म्हणजेच आपलं नववर्ष हो! मुळात ब-याच तरुणांना गुढीपाडवा म्हणजे काय हेच माहीत नसतं. गुढीपाडवा हे आपलं नववर्ष की विजयादशमी याच गोंधळात अनेक जण असतात.
गेल्याच वर्षी एका मुलानं दस-याच्या दिवशी हिंदू नववर्षाच्या हार्दिक शुभेच्छा अशी स्टेटस एफबीवर अपलोड केली होती. त्यावर तुलाही नव्या वर्षाच्या शुभेच्छा अशा कमेंट आल्या होत्या.
गुढीपाडव्याला चैत्राची चाहूल सुरू होते, चैत्र पालवी फुटते, चैत्रोत्सव सुरू होतो. आता काही जणांना चैत्राची चाहूल असं काय विचारल्यावर, तो एका मराठी चॅनेलचा शो असावा बहुदा असं उत्तर मिळालं ! तर कोणी गुढीपाडवा म्हणजे ‘मे बी इट्स रिलेटेड टू गुडीज्’ असं म्हणतात. या मुलांचा गुडीज् म्हणजे छानछान भेटवस्तू असा समज असतो. त्यामुळे हा तसल्याच काही भेटी देण्याचा दिवस असावा असं त्यांना वाटत असतं.
तर कोणी महाभाग गुढीपाडवा म्हणजे गुड (चांगल्या) लोकांचा पाडवा म्हणून गुढीपाडवा असा अर्थ शोधून काढतात. हुश्श्.. इथून सुरुवात होते गुढीपाडव्याच्या ज्ञानाची. पण असो, तरुणाईतला एक अज्ञानी वर्ग असाच राहिला. तर दुसरा वर्ग एक नवा पायंडा पाडू पाहतोय. तो नववर्ष साजरा करण्याचा. आपण गो-या लोकांचं नववर्ष इतक्या उत्साहात साजरं करू शकतो तर मग आपलं का नाही..? बरोबर ना?
अशा विचाराची ही मुलं बेधुंद होऊन, फटाके फोडून, डिस्कोच्या तलावर थिरकून मध्यरात्री ‘न्यू इअरचं’ स्वागत करण्यापेक्षा ढोल-ताशे, लेझीमच्या गजरात, पारंपरिक वस्त्रात आणि सांस्कृतिक थाटात नववर्षाचं स्वागत करण्यासाठी जास्त उत्सुक असतात.
त्यामुळे गुढीपाडवा साजरा करण्याचा ट्रेंडच सुरू होतोय. तसं गिरगाव, डोंबिवली, विलेपार्ले यासारख्या ठिकाणाहून दरवर्षी नववर्षाच्या स्वागतासाठी शोभायात्रा निघते.
यात भाग घेणा-यांची संख्या फक्त गिरगावकर, डोंबिवलीकर, पार्लेकर या ‘करां’पुरती मर्यादित राहिलेली नाही; पण सोशल मीडियामुळे या परिसरात न राहणा-या इतरही मराठमोळ्या तरुणांना या शोभायात्रांनी भारीच वेड लावलं आहे.
फेटे, कुडता-पायजमा, भिकबाळी घालून जोरात आवाज करत बाईक रॅलीमध्ये उतरणा-या तरुणांची आतापर्यंत चलती होती. पण यात आता बाजी मारली आहे ती मुलींनी.
कोण म्हणतं फक्त मुलंच रॅलीत भाग घेतात आणि रॉयल एनफिल्ड मुलंच चालवू शकतात शोभायात्रेच्या निमित्ताने मुलींनी नववर्षाचं स्वागत अनोख्या पद्धतीनं कसं करतात हे दाखवून दिलं आहे.
त्यामुळे नववारी साडी, आणि पारंपरिक शृंगार करून मोठया अभिमानानं मुली यात भाग घेत आहेत. एरव्ही साडीत दोन पाऊल पुढे टाकताना धडपणा-या या तरुणी वर्ग रॉयल एनफिल्डसारखी अवजड बाईक, तेही पारंपरिक वेशात या दिवशी चालवताना दिसतात.
दुसरीकडे गिटार, रॉक बँड, पॉप संगीताच्या दुनियेत हरवत चाललेला तरुण वर्ग इथे मात्र ढोल-ताशे आणि लेझीमच्या गजरात नववर्षाचं स्वागत करण्यासाठी भल्या सकाळीच रस्त्यावर अवतरतो.
गुढीपाडव्याच्या दिवशी लवकर उठ असं या तरुणांना हल्ली सांगावं लागत नाही. कोणी भगवे फेटे बांधून पारंपरिक वेशभूषेत काढलेले फोटो सोशल मीडियावर अपलोड करतायत, तर कोणी विविधरंगी साडया मिरवतायत, त्यामुळे एकाअर्थी ज्यांना माहिती नाही अशा लोकांमध्येही आपल्या हिंदू नववर्षाचा प्रसार होतोय.
थोडक्यात काय, एकीकडे कमालीचं अज्ञान, दुसरीकडे परंपरा जपण्याचा प्रयत्न अशात तरुण वर्ग अडकलाय. काही जण सेल्फी काढून सोशल मीडियावर अपलोड करण्यासाठी शोभायात्रेत सामील होतायत, तर कोणी परंपरा पुढे नेण्यासाठी.
कारणं प्रत्येकाची काहीही असोत; पण परंपरेचं महत्त्व जपणं तितकंच महत्त्वाचं, त्यामुळे जितक्या जास्त संख्येनं भाग घ्याल, जितकं आपल्या या सणाबद्दल बोलाल तितका आपल्या सणांचा, संस्कृतीचा प्रसार अधिक होईल. बाकी सगळ्यांना अॅडव्हान्समध्ये ‘हॅप्पी न्यू इअर’. ओ! चुकलंच हॅप्पी न्यू इअर म्हणण्यापेक्षा नववर्षाच्या शुभेच्छा..!