जगज्जेता विश्वनाथन आनंद जगज्जेतेपदाच्या लढतीत सोमवारी सातव्या डावातही विजय नोंदवू शकला नाही.
चेन्नई- जगज्जेता विश्वनाथन आनंद जगज्जेतेपदाच्या लढतीत सोमवारी सातव्या डावातही विजय नोंदवू शकला नाही. त्याला आव्हानवीर आणि अव्वल मानांकित नॉर्वेच्या मॅग्नस कार्लसनने ३२ चालींत बरोबरी मान्य करायला लावली. हा डाव जवळपास दोन तास रंगला. याबरोबरच कार्लसनने लढतीत दोन विजयांसह आनंदवर दोन गुणांची आघाडी कायम ठेवली. आता लढतीत पाच डावच बाकी असल्याने त्यात एकही डाव न गमावता किमान दोन विजय नोंदवणे आनंदसाठी गरजेचे आहे. अन्यथा त्याच्या हातून जगज्जेतेपद जाऊ शकते. त्यातच आता उर्वरीत पाच डावांमध्ये कार्लसन तीनवेळा पांढरी मोहरी घेऊन खेळेल.
याउलट कार्लसन सलग दोन विजयानंतर आत्मविश्वासाने खेळताना सातव्या डावात दिसला. कार्लसनने काळी मोहरी घेऊन खेळताना पुन्हा बर्लिन रॉय लोपेझ डिफेन्स पद्धत वापरली. आनंदसाठी ती पद्धत या लढतीत डोकेदुखी ठरली आहे. कार्लसनने बरोबर तेच हेरत आनंदवरील दडपणात आणखी वाढ केली.
आनंदने पाचव्या चालीत कार्लसनचा घोडा मारत स्वत:चा उंट गमावला. मात्र आनंदला या चालीचा विशेष फायदा झाला नाही. कारण त्याच्या प्यादी (पॉन्स) पुढे करण्याच्या चालींना कार्लसनने जशास तसे उत्तर दिले. त्यातच १०व्या चालीपर्यंत आनंदला संधी असल्याचे पटावर दिसत होते. मात्र त्याने एंडगेममधील धोके ओळखून आणखीन आक्रमक चाली खेळल्या नाहीत. त्यातच १५व्या चालीला त्याने हत्तीच्यादिशेतील प्यादे (रुक पॉन) पुढे सरकवत वेगळी चाल खेळण्याचा प्रयत्न केला. मात्र कार्लसनने हुशारीने त्याच्या प्यादाला बाद केले.
२४व्या चालीपर्यंत दोघांचेही हत्ती आणि उंट गारद झाल्यावर बरोबरी ठळक दिसू लागली. त्यात दोघांनी वजिरावजिरीलाही प्राधान्य दिले नाही. त्यापाठोपाठ पटावर दोघांचे वजीर, घोडा आणि पाच प्यादी शिल्लक असताना बरोबरी मान्य झाली.
या डावात प्रभावी चाली मला करता आल्या नसल्या तरी माझी पटावरील स्थिती वाईट नव्हती. या डावात आम्हाला दोघांनाही नियोजनाप्रमाणे चाली करता आल्या नाहीत. त्यातच सलग दोन डाव जिंकल्याने माझे मनोधैर्य उंचावणे स्वाभाविक होते. मात्र जगज्जेतेपदासारख्या लढतीत त्यावरच अवलंबून राहणे परवडणारे नाही. – कार्लसन
सलग दोन पराभवांनंतर बरोबरीत डाव सोडवता आला याचे समाधान वाटले. या डावात मी कार्लसनवर दडपण टाकेन असे वाटले होते पण प्रत्यक्षात तसे घडले नाही. आता उर्वरित डावांमध्ये विजयाचा निश्चित प्रयत्न करेन. – आनंद
सोशल मीडियाबाबत भिन्न मते
लढतीच्या दिवसांमध्ये सोशल मीडियावर येत असलेल्या प्रतिक्रिया पाहता का? या प्रश्नावर आनंद आणि कार्लसन या दोघांच्याही भिन्न प्रतिक्रिया होत्या. ‘‘सोशल मीडियावर येणा-या प्रतिक्रिया पाहण्याची गरज आहे का याबाबत माझे संघसहकारी निर्णय घेतील,’’ असे आनंदने म्हटले. याउलट कार्लसनने तो थोडयाफार प्रमाणात प्रतिक्रिया वाचत असल्याचे उत्तर दिले. ‘‘मला शुभेच्छा देणा-यांचा मी आभारी आहे,’’ असे कार्लसनने म्हटले.
कार्लसन ठरलाय नॉर्वेचा सर्वात मोठा ब्रॅँड
कार्लसन हा नॉर्वेचा सर्वात मोठा ब्रॅँड ठरल्याचे त्याच्या देशातील आघाडीचे वृत्तपत्र डॅगब्लॅडेटने म्हटले आहे. कार्लसनने जगज्जेतेपदाच्या लढतीत आनंदवर भक्कम तयारीने कसे दोन विजय नोंदवले त्याचेही वर्णन त्या वृत्तपत्रात करण्यात आले आहे. कार्लसन आता आनंदला त्याच्याच देशात आणि त्याच्याच शहरात हरवण्याचा पराक्रम करणार, अशी आशाही त्या वृत्तपत्राने व्यक्त केली आहे.
सातवा डाव
1. e4 e5 2. Nf3 Nc6 3. Bb5 Nf6 4. d3 Bc5 5. Bxc6 dxc6 6. Nbd2 Bg4 7. h3 Bh5 8. Nf1 Nd7 9. Ng3 Bxf3 10. Qxf3 g6 11. Be3 Qe7 12. O-O-O O-O-O 13. Ne2 Rhe8 14. Kb1 b6 15. h4 Kb7 16. h5 Bxe3 17. Qxe3 Nc5 18. hxg6 hxg6 19. g3 a5 20. Rh7 Rh8 21. Rdh1 Rxh7 22. Rxh7 Qf6 23. f4 Rh8 24. Rxh8 Qxh8 25. fxe5 Qxe5 26. Qf3 f5 27. exf5 gxf5 28. c3 Ne6 29. Kc2 Ng5 30. Qf2 Ne6 31. Qf3 Ng5 32. Qf2 Ne6 ½-½IYf»fÊÀf³f u.v – Af³faQ s.v
