जगज्जेता विश्वनाथन आनंदला मंगळवारी जगज्जेतेपदाच्या लढतीत तिस-या डावात आव्हानवीर अव्वल मानांकित नॉर्वेच्या मॅग्नस कार्लसनने बरोबरीत रोखले.
चेन्नई- जगज्जेता विश्वनाथन आनंदला मंगळवारी जगज्जेतेपदाच्या लढतीत तिस-या डावात आव्हानवीर अव्वल मानांकित नॉर्वेच्या मॅग्नस कार्लसनने बरोबरीत रोखले. जवळपास साडेचार तास रंगलेल्या या डावात ५१ चालींनंतर काळी मोहरी घेऊन खेळताना आनंदला बरोबरी मान्य करावी लागली. या डावात आनंदच्याबाजूने सकारात्मक परिस्थिती दिसली असली तरी कार्लसननेही हार मानली नाही. आनंदच्या प्रत्येक प्रभावी चालीला त्याने उत्तर दिले. आता तीनही डाव बरोबरीत संपल्याने दोघांचेही समान दीड गुण झाले आहेत.
कार्लसनने पुन्हा एकदा पहिल्या डावाप्रमाणे रेटी ओपनिंगशी निगडित सुरुवात करत आनंदला आश्चर्यचकित केले. त्यातच चौथ्या चालीत कार्लसनने वजिर पुढे करत आनंदला ‘चेक’ दिला. मात्र कार्लसनची ती चाल फारशी प्रभावी ठरलेली दिसली नाही. कारण आनंदच्या पुढे आलेल्या घोडयाने कार्लसनला फारशी संधी मिळाली नाही.
आठव्या चालीला दोघांनी कॅसलिंग केले. आनंदने १०व्या चालीला घोडा पटाच्या मध्यावर आणत खरी रंगत वाढवली. त्या चालीवर कार्लसन विचार करणे भाग पडले. मात्र त्याने आनंदचा घोडा मारून धोका टाळला. १३व्या चालीला आनंदकडून वजिरावजिरीसाठी झालेला प्रयत्न कार्लसनने परतवून लावला. तेथेच डावातील रंगत वाढणार हे चित्र स्पष्ट झाले होते.
पहिल्या तीन तासांत २२ चालीच झाल्या होत्या. त्यातच ३५ चालींपर्यंत पटावर दोघांचे उंट, वजिर, हत्ती दिसत होते. मात्र त्या चालीपासून दोघांचाही खेळाचा वेग वाढताना दिसला. दोघांनीही एकमेकांची समसमान प्यादी मारली. अखेर ४८व्या चालीपासून दोघे राजा, प्रत्येकी एक प्यादे आणि प्रत्येकी एक उंट यांच्या जोरावर एकमेकांना आव्हान देत राहिले. मात्र शेवटच्या तीन चालींत एकमेकांना ‘चेक’ देण्याचे काही प्रयत्न निष्फळ ठरल्यावर बरोबरी मान्य करावीच लागली.
घाबरल्याचे कार्लसनकडून मान्य
पत्रकार परिषदेत आपण एकावेळी घाबरल्याचे कार्लसनने मान्य केले. ‘‘माझा खेळ चांगला झाला नाही. काही चांगल्या चाली खेळण्यात मी पूर्णपणे अपयशी ठरलो. ही स्थिती धोकादायक नसली तरी मला घाबरवणारी होती,’’ असे कार्लसनने म्हटले. याउलट आनंदने खेळातील रंगत पाहता आपण वजिराच्याबाजूकडील मोह-या हलवल्या असत्या तर कदाचित आणखी चांगला खेळ झाला असता, याकडे लक्ष वेधले.
आनंद बुधवारी खेळणार पांढ-या मोह-यांनी
आनंद बुधवारी (१३ नोव्हेंबर) चौथ्या डावात पांढ-या मोह-यांनी खेळणार आहे.
कास्पारॉवला पाहिलेच नाही
माजी जगज्जेता रशियाचा गॅरी कास्पारॉवचे सोमवारी मोठया थाटामाटात आगमन झाले होते. त्यापाठोपाठ तो ब-याच मुलाखतींनाही सामोरा गेला. त्यावेळी तो कार्लसनला मदत करेल अशी चर्चा होती. मात्र तिसरा डाव संपल्यानंतर पत्रकार परिषदेत वेगळेच उत्तर ऐकायला मिळाले. ‘‘आपण कास्पारॉवला पाहिले नाही,’’ असे आनंदने सांगताच कार्लसननेही तेच उत्तर दिले.
मोठा टीआरपी
तिस-या डावात भारतात सर्वात मोठा टीआरपी मिळाल्याचे आढळून आले. हा डाव भारतात जवळपास सात कोटी बुद्धिबळप्रेमींनी पाहिल्याचे सर्वेक्षणात दिसले. त्याशिवाय हा डाव ४८ पेक्षा जास्त देशांतील बुद्धिबळप्रेमींनी पाहिला.
तिसरा डाव
1. /RNf3 d5 2. g3 g6 3. c4 dxc4 4. Qa4+ Nc6 5. Bg2 Bg7 6. Nc3 e5 7. Qxc4 Nge7 8. O-O O-O 9. d3 h6 10. Bd2 Nd4 11. Nxd4 exd4 12. Ne4 c6 13. Bb4 . Be6 14. Qc1 Bd5 15. a4 b6 16. Bxe7 Qxe7 17. a5 Rab8 18. Re1 Rfc8 19. axb6 axb6 20. Qf4 Rd8 21. h4 Kh7 22. Nd2 Be5 23. Qg4 h5 24. Qh3 Be6 25. Qh1c5 26. Ne4 Kg7 27. Ng5 b5 28. e3 dxe3 29. Rxe3 Bd4 30. Re2 c4 31. Nxe6+ fxe 32. Be4 cxd3 33. Rd2 Qb4 34. Rad1 Bxb2 35. Qf3 Bf6 36. Rxd3 Rxd3 37. Rxd3 Rd8 38. Rxd8 Bxd8 39. Bd3 Qd4 40. Bxb5 Qf6 41. Qb7+ Be7 42. Kg2 g5 43. hxg5 Qxg5 44. Bc4 h4 45. Qc7 hxg3 46. Qxg3 e5 47. Kf3 Qxg3+ 48. fxg3 Bc5 49. Ke4 Bd4 50. Kf5 Bf2 51. Kxe5 Bxg
