प्रथम पोटावर झोपावं. आता दोन्ही हातांचे तळवे हे मांडीखाली ठेवावे. हनुवटी ही जमिनीला लावावी. दोन्ही पाय सरळ आणि ताठ ठेवावेत. हळुवारपणे डावा पाय जेवढा वर उचलता येईल तेवढा वर उचलावा.
प्रथम पोटावर झोपावं. आता दोन्ही हातांचे तळवे हे मांडीखाली ठेवावे. हनुवटी ही जमिनीला लावावी. दोन्ही पाय सरळ आणि ताठ ठेवावेत. हळुवारपणे डावा पाय जेवढा वर उचलता येईल तेवढा वर उचलावा. काही सेकंद या आसनस्थितीत राहावे. मग हळुवारपणे पाय खाली आणावा. तसेच उजवा पाय वर उचलावा. हळुवारपणे पायाला खाली आणावं. मांडय़ांखाली ठेवलेला हात अलगद काढावा. पूर्ण शरीराला काही सेकंद रिलॅक्स ठेवावं.
जेव्हा आपण पाय वरती नेतो तेव्हा तो सरळ दिशेने वरती आणावा. ट्विस्ट करू नये. कंबरेखालील भाग ट्विस्ट होता कामा नये. पाय हा सरळ ताठ ठेवण्याचा प्रयत्न करावा. गुडघ्यामध्ये वाकवू नयेत.
श्वास
» श्वास घेताना सुरुवातीची स्थिती असावी.
» पाय वरती नेताना श्वास थांबवावा आणि तसंच शेवटच्या स्थितीमध्ये सुद्धा काही सेकंद थांबवावा.
» पाय खाली आणताना श्वास सोडावा.
वेळ
» सुरुवातीला दोन वेळा करावं. मनातल्या मनात दहा अंक मोजावेत. नंतर हळुवारपणे अंक वाढवावेत.
आसन करताना घ्यायची काळजी
» हे आसन करताना मानेला जास्त ताण येणार नाही याची काळजी घ्यावी. तसंच पाय वरती आणताना तो सरळ एका रेषेत म्हणजेच शरीराच्या व पायाच्या पातळीला असावा. गुडघ्यातून पायाला वाकवू नये. तसंच पाय सरळ आणि ताठ असावा.
» समजा तुम्ही डावा पाय उचलला आहे पण तो उजव्या पायाच्या दिशेने वळला असेल तर चुकीचं आहे. असं करू नये. पाय उचलताना जोरात किंवा घाईने उचलू नये. पाठीला हादरा बसू शकतो. जेवढा पाय वरती उचलता येईल तेवढाच वरती उचलावा. सुरुवातीला जास्त ताण देऊ नये.
फायदे
» या आसनाने कमरेखालील भाग मजबूत होतात.
» या आसनाच्या नित्य सरावाने कंबरदुखीचा त्रास कमी होतो.
» गुडघे, कंबर अािण पोटावरील चरबी कमी होण्यास मदत होते.
» शलभासनाने पोटाला चांगलाच व्यायाम मिळतो.
» या आसनाने मांडीवरील चरबी कमी होण्यास मदत होते.
विशेष नोंद
ज्या व्यक्तींचे हृदय कमजोर आहे, कॉर्नोरी थ्रॉम्बायोसिस किंवा उच्च रक्तदाब तसेच ज्या व्यक्तींना पेप्टिक अल्सर, हर्निया, आतडय़ांचा क्षयरोग असेल यांनी या आसनाचा सराव करू नये.