लोकेश घेणार जर्मनीत दुखापतीवर उपचार

मुंबई (वृत्तसंस्था) : टीम इंडियाचा युवा सलामीवीर फलंदाज लोकेश राहुल दुखापतीतून अद्याप पूर्णपणे सावरला नसल्याने इंग्लंड दौऱ्यातून बाहेर झाला आहे. आता तो लवकरच जर्मनी येथे या दुखापतीवर उपचार घेण्यासाठी जाणार असल्याचे समजते. याबाबत अद्याप बीसीसीआयने कोणत्याही प्रकारची प्रतिक्रिया दिली नाही.

भारतीय संघ आगामी इंग्लंड दौऱ्यामध्ये एका कसोटीसह प्रत्येकी तीन एकदिवसीय आणि टी-२० सामन्यांची मालिका खेळणार आहे. १ जुलैपासून या दौऱ्याला सुरुवात होणार आहे. सुरुवातीला कसोटी सामन्यात हे दोन्ही संघ समोरासमोर असतील. त्यानंतर ७ ते १७ जुलै दरम्यान एकदिवसीय आणि टी-२० मालिका रंगणार आहे.

१ जुलैपासून भारत आणि यजमान इंग्लंड यांच्यातील एकमेव कसोटी सामन्याला सुरुवात होणार आहे. त्यानंतर एकदिवसीय आणि टी-२० सामन्यांची मालिका रंगणार आहे. मालिकेसाठी भारतीय संघ गुरुवारी इंग्लंडमध्ये दाखल झाला. दरम्यान, संघामध्ये कोहलीसह पुजारा, शुभमन गिल, सिराजचा समावेश आहे.