इसिस भारतावर हल्ला करणार

रशियात अटक केलेल्या इसिसच्या दहशतवाद्याकडून धक्कादायक माहिती उघड

मॉस्को : रशियन सुरक्षा एजन्सीने इसिसच्या दहशतवादी संघटनेशी संबंधित एका दहशतवाद्याला ताब्यात घेतले आहे. धक्कादायक बाब म्हणजे चौकशीमध्ये या दहशतवाद्याने इसिस भारतावर हल्ल्याची योजना आखत असल्याचे सांगितले. एवढेच नव्हे तर, भारतातील मोठ्या नेत्यांवरही आत्मघातकी हल्ला करण्याच्या कट इसिसने रचल्याचा खुलासादेखील केला आहे. यामुळे एकच खळबळ उडाली आहे.

रशियन न्यूज एजन्सी स्पुतनिकच्या म्हणण्यानुसार, प्राथमिक चौकशीदरम्यान, या दहशतवाद्याने कबूल केले आहे की, त्याने एका सर्वोच्च भारतीय नेत्याला लक्ष्य करण्याचा कट रचला होता. एवढेच नव्हे तर, इसिस भारतात हल्ल्याची योजना आखत असल्याचेही त्याने सांगितले. अटक करण्यात आलेल्या दहशतवाद्याची आयएसआयएसने तुर्कस्तानमध्ये आत्मघाती बॉम्बर म्हणून नियुक्ती केली होती.

रशियाच्या फेडरल सिक्युरिटी सर्व्हिसने या दहशतवाद्याला ओळखले आणि त्याला अटक केली असून, हा दहशतवादी मूळचा मध्य आशियाई भागातील असल्याचे सांगितले जात आहे. बेकायदेशीर कृत्य प्रतिबंध कायदा, १९६७ अंतर्गत भारताने इसिस आणि त्याच्याशी संलग्न सर्व संघटनांना दहशतवादी संघटना म्हणून घोषित केले आहे. गृह मंत्रालयाच्या म्हणण्यानुसार, इसिसने इंटरनेटवरील कोणत्याही सोशल मीडिया प्लॅटफॉर्मचा वापर करून त्यांची विचारधारा पसरवली. सायबर स्पेसवरील एजन्सी याबाबत दक्ष आहेत आणि कायद्यानुसार त्यांच्यावर कारवाई केली जात आहे.