महानगरपालिकांच्या मतदार याद्यांवर हरकतीसाठी मुदतवाढ ३ जुलै पर्यंत

मुंबई (प्रतिनिधी) : राज्यातील १४ महानगरपालिकांच्या सार्वत्रिक निवडणुकांसाठी प्रारूप मतदार यादी प्रसिध्द करण्यात आली होती, या याद्यांवर हरकती व सूचना दाखल करण्यासाठी १ जुलै २०२२ पर्यंतची मुदत देण्यात आली होती. मात्र आता मुदतवाढ देण्यात आली असून ३ जुलै २०२२ पर्यंत सूचना व हरकती पाठवता येणार आहे.

दरम्यान मुंबई महापालिकेसह, ठाणे, नवी मुंबई, कल्याण- डोंबिवली, उल्हासनगर, वसई- विरार, पुणे, पिंपरी- चिंचवड, सोलापूर, कोल्हापूर, नाशिक, अकोला, अमरावती आणि नागपूर महानगरपालिकेच्या सार्वत्रिक निवडणुकांसाठी प्रभागनिहाय प्रारूप मतदार याद्या प्रसिद्ध करण्यात आल्या आहेत. प्रभागनिहाय प्रारूप मतदार याद्या महानगरपालिका, त्यांचे संकेतस्थळ आणि ट्रू- व्होटर मोबाईल ॲपवरही उपलब्ध आहेत.

त्यावर १ जुलै २०२२ पर्यंत हरकती व सूचना दाखल करण्याची मुदत देण्यात आली होती मात्र आता ही मुदत वाढवण्यात आली असून ३ जुलै २०२२ पर्यंत मुदत दिली आहे. तर त्यासाठी रविवार व शनिवारच्या सुट्टीच्या दिवशीदेखील आवश्यक ती व्यवस्था करण्यात येणार आहे.

महानगरपालिका कार्यालय किंवा त्यांनी प्राधिकृत केलेल्या ठिकाणी आणि ट्रू- व्होटर मोबाईल ॲपद्वारेदेखील हरकती व सूचना दाखल करता येणार आहे. हरकती व सूचना दाखल करण्यासाठी मुदतवाढ देण्यात आली असली तरी प्रभागनिहाय अंतिम मतदार याद्या ९ जुलै २०२२ रोजीच प्रसिद्ध करण्यात येणार आहे