मुंबई: बॉलिवूडचा चॉकलेट बॉय समजला जाणारा रणबीर कपूर(ranbir kapoor) अडचणीत सापडल्याचे दिसत आहे. या अभिनेत्याला महादेव बुक बेटिंग अॅप प्रकरणात अंमलबजावणी संचलनालयाने(ED) समन्स पाठवले आहेत. लवकरच रणबीरला यासाठी चौकशीसाठी बोलावले जाऊ शकते.
ऑनलाईन गेमिंग प्रकरणात अडकला अभिनेता
रणबीर कपूर हा महादेव ऑनलाईन गेमिंग अॅप प्रकरणातील आरोपी सौरभ चंद्राकारच्या लग्नात सामील झाल्याने त्याचे नाव या प्रकरणात पुढे आले. मिळालेल्या माहितीनुसार रणबीर कपूरला हे समन्स चौकशीसाठी पाठवण्यात आले आहेत. दरम्यान, या प्रकरणात रणबीर कपूरशिवाय इतर अनेक स्टार्सचीही नावे समोर आली आहे जे ईडीच्या रडारवर आहेत. या यादीत सनी लिओनी, पाकिस्तानी सिंगर आतिफ असलम, राहत फतेह अली खान, बॉलिवूड सिंगर नेहा कक्कर, विशाल ददलानी आहेत.
दुबईत झाले होते सौरभ चंद्राकरचे लग्न
रिपोर्ट्सनुसार बॉलिवूडचे अनेक स्टार्स या वर्षाच्या सुरूवातीला फेब्रुवारीमध्ये महादेव बुक अॅप प्रमोटर सौरभ चंद्राकरच्या लग्नात सामील झाले होते. सौरभचे लग्न दुबईत अतिशय ग्रँड पद्धतीने झाले होते. या लग्नासाठी तब्बल २०० कोटींचा खर्च करण्यात आला होता. अनेक स्टार्सनी या लग्नात परफॉर्मन्स केला होता.
या सिनेमात दिसणार रणबीर कपूर
कामाच्या बाबतीत बोलायचे झाल्यास रणबीर कपूर लवकरच अॅनिमल या सिनेमात दिसणार आहेत. नुकताच या सिनेमाचा टीझर रिलीज करण्यात आला. सिनेमात रणबीर कपूरसह अभिनेता बॉबी देओलही दिसणार आहे. सिनेमा या वर्षी १ डिसेंबरला थिएटरमध्ये रिलीज होणार आहे.