मुंबई : मुंबईतील कुर्ला-ट्रॉम्बे रेल्वे मार्गावर पहाटेच्या सुमारास मोठी दुर्घटना घडली. एमएमआरडीएकडून सुरू असलेल्या विकासकामादरम्यान एक मोठी क्रेन थेट कुर्ला-ट्रॉम्बे सिंगल रेल्वे मार्गावरील ओव्हरहेड वायरवर कोसळली. त्यानंतर क्रेन रेल्वे रुळावर आली. या दुर्घटनेत परिसरातील काही घरांचेही नुकसान झाले असून 8 ते 10 जण जखमी झाल्याची प्राथमिक माहिती आहे. (Mumbai Crane Accident)
मिळालेल्या माहितीनुसार, ही घटना पहाटे साडे3 वाजण्याच्या सुमारास घडली. विकासकाम सुरू असताना अचानक क्रेनचा समतोल बिघडला आणि ती रेल्वे मार्गाच्या दिशेने कोसळली. क्रेन ओव्हरहेड वायरवर पडल्याने परिसरात मोठी खळबळ उडाली.
अपघाताची माहिती मिळताच स्थानिक नागरिक आणि संबंधित कर्मचाऱ्यांनी तातडीने मदतकार्य सुरू केले. जखमींना उपचारासाठी जवळच्या रुग्णालयात दाखल करण्यात आले आहे. जखमींची प्रकृती आणि त्यांच्या दुखापतींची सविस्तर माहिती अद्याप समोर आलेली नाही. (Mumbai News)
राज्यात पावसाचा जोर अजूनही कायम आहे. हवामान विभागाने दिलेल्या नव्या अंदाजानुसार आगामी तीन दिवस महाराष्ट्रातील विविध विभागांमध्ये पावसाची वेगवेगळी ...
या रेल्वे मार्गाच्या दोन्ही बाजूंना झोपडपट्टी आणि रहिवासी वसाहती आहेत. क्रेन कोसळल्यामुळे या भागातील काही घरांचे नुकसान झाल्याची माहिती आहे. त्यामुळे या दुर्घटनेनंतर परिसरातील नागरिकांमध्ये भीतीचे वातावरण निर्माण झाले.
प्राथमिक माहितीनुसार, क्रेनमध्ये तांत्रिक बिघाड झाल्यामुळे तिचा समतोल बिघडला असावा, असा अंदाज व्यक्त केला जात आहे. मात्र, अपघाताचे नेमके कारण अद्याप स्पष्ट झालेले नाही. संबंधित यंत्रणांकडून या घटनेची पाहणी करून कारण शोधले जात आहे. (Kurla Trombay Accident)
रेल्वे मार्गावरील ओव्हरहेड वायरचे नुकसान झाल्याने रेल्वे वाहतुकीवरही परिणाम होण्याची शक्यता आहे. क्रेन हटवणे आणि रेल्वे मार्ग सुरक्षित करण्याचे काम संबंधित यंत्रणांकडून हाती घेण्यात येणार आहे. या दुर्घटनेबाबत अधिकृत तपासानंतरच नेमकी परिस्थिती स्पष्ट होणार आहे.
