MPSC Group C 2026: उमेदवारांची धाकधूक वाढली! तलाठीचा अर्ज भरण्याचा आज शेवटचा दिवस; साईट डाऊन होण्याआधी करा अर्ज

मुंबई : महाराष्ट्र लोकसेवा आयोगाच्या (MPSC) महाराष्ट्र गट-क सेवा संयुक्त पूर्व परीक्षा 2026 अंतर्गत तलाठी (ग्राम महसूल अधिकारी) आणि इतर विविध संवर्गातील एकूण 5,707 पदांसाठी अर्ज करण्याची अंतिम मुदत आज (5 ऑगस्ट) रात्री 11:59 वाजेपर्यंत आहे. अद्याप अर्ज न केलेल्या उमेदवारांनी शेवटच्या क्षणाची गर्दी टाळून तातडीने अर्ज सादर करण्याचे आवाहन आयोगाने केले आहे.

या भरती प्रक्रियेत तलाठीची 1,539 पदे, तसेच लिपिक-टंकलेखक आणि इतर विविध संवर्गातील पदांचा समावेश आहे. तलाठी पदासाठी उमेदवाराकडे कोणत्याही मान्यताप्राप्त विद्यापीठाची कोणत्याही शाखेतील पदवी असणे आवश्यक आहे.

गट-क संयुक्त पूर्व परीक्षा 25 ऑक्टोबर 2026 रोजी ऑफलाइन (OMR आधारित) पद्धतीने घेण्यात येणार आहे. अर्ज सादर करण्याची मुदत आज संपत असली, तरी ऑनलाइन परीक्षा शुल्क भरण्यासाठी 8 ऑगस्ट 2026 रोजी रात्री 11:59 वाजेपर्यंत वेळ देण्यात आला आहे. आयोगाने यंदा चलनाद्वारे शुल्क भरण्याची सुविधा बंद केली आहे.

जाहिरातीत पद आरक्षित नसणे, पदसंख्या कमी असणे किंवा एखाद्या संवर्गाचा समावेश नसणे या कारणांमुळे अर्ज न केल्यास, त्याबाबतची कोणतीही तक्रार नंतर स्वीकारली जाणार नाही, असे आयोगाने स्पष्ट केले आहे.

अर्ज कसा कराल?

• MPSC च्या अधिकृत संकेतस्थळावर लॉगिन करा.


• नवीन भरती विभागात जाऊन 'गट-क' जाहिरातीची निवड करा.


• पात्र असलेल्या पदांसमोरील चेकबॉक्स निवडा.


• आवश्यक माहिती भरून परीक्षा केंद्राची निवड करा.


• ऑनलाइन शुल्क भरून अर्ज सबमिट करा.


• अर्जाची प्रिंटआउट भविष्यासाठी सुरक्षित ठेवावी.

पात्र उमेदवारांनी अधिकृत संकेतस्थळावरूनच अर्ज सादर करून अंतिम मुदत चुकवू नये, असे आयोगाने म्हटले आहे.