Sonam Wangchuk Fast : 26 दिवसांनंतर सोनम वांगचुक यांनी सोडलं उपोषण; हिंसाचार टाळण्यासाठी घेतला मोठा निर्णय

Sonam Wangchuk Fast : सोनम वांगचुक (Sonam Wangchuk) यांनी 26 दिवसांपासून सुरू असलेले बेमुदत उपोषण अखेर मागे घेतले आहे. दीर्घ चर्चेनंतर आणि देशात कोणताही तणाव किंवा हिंसाचार निर्माण होऊ नये, याचा विचार करून हा निर्णय घेतल्याचे त्यांनी सांगितले. गुरुवारी मध्यरात्रीनंतर हरियाणातील गुरुग्राम येथील मेदांता रुग्णालयात त्यांनी उपोषण सोडले. यावेळी केंद्रीय मंत्री जे. पी. नड्डा (JP Nadda,), डॉ. जितेंद्र सिंह, लेह-लडाख एपेक्स बॉडीचे प्रतिनिधी तसेच त्यांच्या पत्नी गीतांजली उपस्थित होत्या.

एक्सवरून शेअर केली माहिती

उपोषण संपल्यानंतर सोनम वांगचुक यांनी सोशल मीडिया प्लॅटफॉर्म X वरून पहिली प्रतिक्रिया दिली. रुग्णालयातील बेडवरून त्यांनी एक छायाचित्रही शेअर केले. या पोस्टमध्ये त्यांनी 26 दिवसांनंतर उपोषण संपवल्याची माहिती देत, हा निर्णय अनेक स्तरांवर चर्चा झाल्यानंतर घेतल्याचे स्पष्ट केले. ( Sonam Wangchuk Fast)

Just now in the presence of Union Ministers Sh. JP Nadda, Dr. Jitendra Singh and the senior leaders of Apex Body of Leh Ladakh I finally broke my fast after 26 days. Earlier 65 members of parliament from different political parties had visited or signed letters urging me to break… pic.twitter.com/RFCet7Oksy

— Sonam Wangchuk (@Wangchuk66) July 23, 2026

वांगचुक यांनी सांगितले की, विविध राजकीय पक्षांतील 65 खासदारांनी त्यांची भेट घेतली होती किंवा उपोषण मागे घेण्याची विनंती करणाऱ्या पत्रांवर स्वाक्षऱ्या केल्या होत्या. विविध अटींवर सविस्तर चर्चा झाल्यानंतर आणि देशात हिंसाचार होण्याची शक्यता लक्षात घेऊन उपोषण थांबवण्याचा निर्णय घेण्यात आला. चर्चेदरम्यान नेमक्या कोणत्या मुद्द्यांवर सहमती झाली, याबाबतची माहिती आपण लवकरच स्वतंत्र व्हिडिओद्वारे देणार असल्याचेही त्यांनी सांगितले. तोपर्यंत देशभरात शांतता राखावी आणि कोणत्याही प्रकारच्या हिंसाचारापासून दूर राहावे, असे आवाहन त्यांनी नागरिकांना केले. (NEET Paper Leak)

पंतप्रधान नरेंद्र मोदी यांची प्रतिक्रिया

सोनम वांगचुक यांनी उपोषण सोडल्यानंतर पंतप्रधान नरेंद्र मोदी यांनीही X वरून प्रतिक्रिया दिली. डॉक्टरांच्या सल्ल्यानुसार उपचार घ्यावेत, नियमित दिनचर्या पाळावी आणि पूर्वीप्रमाणे उत्तम आरोग्य व वजन पुन्हा मिळवावे, अशी शुभेच्छा त्यांनी व्यक्त केली.

मैं सोनम जी से आग्रह करता हूँ की वो डॉक्टरों की सलाह के अनुसार अपनी दिनचर्या रखें और जल्द से जल्द अपना पुराना वज़न फिर से प्राप्त करें।

मैं प्रभु से प्रार्थना करता हूँ कि सोनम जी स्वस्थ रहें।@Wangchuk66 @GitanjaliAngmo — Narendra Modi (@narendramodi) July 23, 2026

NEET पेपरफुटी प्रकरणाच्या निषेधार्थ दिल्लीतील जंतर-मंतर (Jantar Mantar Protest) येथे सुरू असलेल्या आंदोलनात सहभागी झाल्यानंतर वांगचुक यांनी 28 जूनपासून बेमुदत उपोषण सुरू केले होते. या आंदोलनातून केंद्रीय शिक्षणमंत्री धर्मेंद्र प्रधान (Dharmendra Pradhan) यांच्या राजीनाम्याची तसेच देशातील शिक्षण व्यवस्थेत व्यापक सुधारणा करण्याची मागणी करण्यात आली होती. 'सोनम सर' म्हणून ओळखले जाणारे वांगचुक या आंदोलनाचा प्रमुख चेहरा बनले होते. 18 जुलै रोजी त्यांना जंतर-मंतरवरील आंदोलनस्थळावरून रुग्णालयात नेण्यात आले. त्यानंतर त्यांना प्रथम सफदरजंग रुग्णालयात आणि नंतर गुरुग्राममधील मेदांता रुग्णालयात दाखल करण्यात आले. उपचार सुरू असतानाही त्यांनी उपोषण कायम ठेवले होते. अखेर 26 दिवसांनंतर त्यांनी आपले बेमुदत उपोषण संपवले.