Friday, November 20, 2026

Nashik : तीन दिवसांच्या मुसळधार पावसाने नाशिकला दिलासा; हंगामातील सरासरी पावसाच्या ८३.४ टक्के पातळी गाठली

Nashik : गेल्या तीन दिवसांपासून झालेल्या जोरदार पावसामुळे नाशिक जिल्ह्याला मोठा दिलासा मिळाला आहे. जून महिन्यात पावसाने दडी मारल्याने निर्माण झालेली पावसाची तूट आता मोठ्या प्रमाणात भरून निघाली असून, जिल्ह्याने हंगामातील सरासरी पावसाच्या ८३.४ टक्के पातळी गाठली आहे.

 जिल्ह्यातील पावसाची तूट निम्म्यावर

जलसंपदा विभागाच्या आकडेवारीनुसार, ६ जुलैपर्यंत ११०.७ मिमी असलेला संचयी पाऊस ९ जुलैपर्यंत २२०.२ मिमीपर्यंत पोहोचला आहे. यामुळे पावसाची तूट जवळपास निम्म्यावर आली असून आता ती सुमारे १८ टक्क्यांवर आहे. जिल्ह्यातील पश्चिम भाग आणि धरणांच्या पाणलोट क्षेत्रात सर्वाधिक पाऊस झाला. त्र्यंबकेश्वरमध्ये (Trimbakeshwar) गेल्या ७२ तासांत तब्बल ४११.८ मिमी पावसाची नोंद झाली असून, हा जिल्ह्यातील सर्वाधिक पाऊस आहे. याशिवाय सुरगाणा, (Surgana), नाशिक (Nashik) , इगतपुरी (Igatpuri) आणि पेठ (Peth) तालुक्यांतही दमदार पाऊस झाला.

सिन्नर तालुक्यातही सरासरीच्या १३०.६ टक्के पाऊस

यंदाच्या हंगामातील एकूण पावसाच्या आकडेवारीत कळवण तालुका १४६.३ टक्के पावसासह अव्वल ठरला आहे. तर यापूर्वी दुष्काळी परिस्थितीचा सामना करणाऱ्या सिन्नर तालुक्यानेही सरासरीच्या १३०.६ टक्के पाऊस नोंदवत उल्लेखनीय कामगिरी केली आहे. बागलाण आणि नांदगाव तालुक्यांनीही सरासरीपेक्षा अधिक पाऊस नोंदवला आहे. मात्र, दिंडोरी, येवला, सुरगाणा, पेठ आणि इगतपुरी या तालुक्यांमध्ये अद्यापही सरासरीपेक्षा कमी पाऊस झाला आहे. विशेषतः पेठ आणि इगतपुरी तालुक्यांमध्ये पावसाची तूट कायम असल्याचे दिसून येत आहे.

बुधवार दुपारपासून पावसाने विश्रांती घेतल्याने जिल्ह्यातील जनजीवन पूर्वपदावर येऊ लागले आहे. सार्वजनिक बांधकाम विभागाच्या माहितीनुसार, काही ठिकाणी रस्त्यांवर खड्डे पडले असले तरी वाहतुकीस कोणताही मोठा अडथळा नसून दुरुस्तीची कामे सुरू करण्यात आली आहेत.

Comments
Add Comment
प्रहार ई-पेपर
हे पण पहा


संबंधित बातम्या आणखी वाचा >