Nashik News : नाशिकमधील प्रसिद्ध हॉटेलमध्ये आढळला तरुणाचा मृतदेह, पोलीस तपास सुरु

नाशिक : नाशिक (Nashik) शहरातील वडाळा नाका परिसरातील नामांकित हॉटेलमध्ये एका तरुणाचा मृतदेह (Deathbody) आढळून आला. या घटनेनंतर परिसरात एकच खळबळ उडाली. रविवारी दुपारी तरुणाचा मृतदेह आढळून आल्याची माहिती पोलिसांना मिळाली. या घटनेमुळे हॉटेल परिसरात काही काळ तणावाचे वातावरण निर्माण झाले होते.

मिळालेल्या माहितीनुसार, अजित पठाण असं मृत तरुणाचे नाव होते. मृत अजित पठाण हे मूळ मुंबईतील वांद्रा येथील रहिवासी असून, सध्या जुने नाशिक येथील बावनपुरा परिसरात वास्तव्यास होते.

नेमकं काय घडलं ?

अजित पठाण हे आपल्या दोन मित्रांसह हॉटेलमध्ये मुक्कामासाठी आले होते. रविवारी सकाळी त्यांचे दोन्ही मित्र नाश्त्यासाठी खाली गेले असता अजित पठाण हे रूममध्येच थांबले होते. नाश्ता करून परत आल्यानंतर रूमचा दरवाजा आतून बंद असल्याचे त्यांच्या निदर्शनास आले. अनेकदा आवाज देऊनही कोणताही प्रतिसाद न मिळाल्याने मित्रांनी दरवाजा तोडून आत प्रवेश केला. त्यावेळी अजित पठाण हे रूममध्ये मृतावस्थेत आढळून आले. घटनेची माहिती मिळताच मुंबई नाका पोलीस ठाण्याचे पोलीस निरीक्षक राजेंद्र मोहिते आणि त्यांच्या पथकाने घटनास्थळी धाव घेत पंचनामा केला. त्यानंतर मृतदेह शवविच्छेदनासाठी शासकीय जिल्हा रुग्णालयात पाठविण्यात आला आहे. दरम्यान, अजित पठाण यांच्या मृत्यूचे नेमके कारण अद्याप स्पष्ट झालेले नाही. शवविच्छेदन अहवाल आणि पोलिसांच्या तपासानंतरच मृत्यूमागील कारण समोर येणार असल्याची माहिती पोलिसांनी दिली आहे. या प्रकरणाचा पुढील तपास पोलीस निरीक्षक राजेंद्र मोहिते आणि त्यांची टीम करत आहे.