कॅफेत बसून रचला गेला होता प्लॅन?
पुणे : पुण्यातील लोहगड (Lohgad) किल्ल्यावर व्यावसायिक केतन अग्रवाल याच्या मृत्यू (Death) प्रकरणाला आता नवे आणि धक्कादायक वळण मिळाले आहे. सुरुवातीला अपघात मानल्या गेलेल्या या घटनेचा तपास जसजसा पुढे सरकत आहे, तसतसे अनेक संशयास्पद तपशील समोर येत आहेत. (Pune Police)
पुणे ग्रामीण पोलिसांच्या गुन्हे शाखेच्या तपासादरम्यान सिया गोयल आणि तिचा मित्र चेतन चौधरी यांचा एका कॅफेमधील सीसीटीव्ही व्हिडिओ समोर आला आहे. हा व्हिडिओ १७ जूनचा असल्याचे सांगितले जात असून, दोघेही पुण्यातील एका प्रसिद्ध कॅफेमध्ये जवळपास एक तास एकत्र बसल्याचे दिसून आले आहे.
तपास अधिकाऱ्यांच्या माहितीनुसार, सायंकाळी साडेचारच्या सुमारास कॅफेमध्ये आलेले सिया आणि चेतन सुमारे एक तास चर्चा करत होते. या चर्चेदरम्यान केतनच्या हत्येच्या कथित कटावर चर्चा झाली असावी, असा संशय पोलिसांनी व्यक्त केला आहे. तसेच घटनेनंतर पुढे काय करायचे यावरही दोघांमध्ये सविस्तर चर्चा झाल्याचा अंदाज वर्तवण्यात येत आहे.
तपासात आणखी एक महत्त्वाची बाब समोर आली आहे. पोलिसांच्या म्हणण्यानुसार, सिया गोयलने घटनेपूर्वी यूट्यूबवर लोहगड किल्ल्याचे अनेक व्हिडिओ शोधले होते. तिने ही माहिती चेतन चौधरीला दिल्याचा संशय व्यक्त केला जात असून, हा संपूर्ण प्रकार पूर्वनियोजित कटाचा भाग असू शकतो, अशी शक्यता तपास यंत्रणा तपासत आहे.
या प्रकरणात पोलिसांनी केवळ सीसीटीव्ही फुटेजच नव्हे तर मोबाईल फोन, चॅट रेकॉर्ड, कॉल डिटेल्स, इंटरनेट सर्च हिस्ट्री आणि आरोपींमधील संवाद यांचाही बारकाईने तपास सुरू केला आहे. डिजिटल पुरावे या तपासातील महत्त्वाचा दुवा ठरत आहेत.
दरम्यान, तपासात असेही समोर आले आहे की, २६ वर्षीय केतन अग्रवालने सिया गोयलच्या वाढदिवसानिमित्त महाबळेश्वरमधील एका आलिशान रिसॉर्टमध्ये ४० ते ५० खोल्यांचे बुकिंग केले होते. वाढदिवसाचा मोठा सोहळा आयोजित करण्याची तयारी सुरू असतानाच त्याचा मृत्यू झाल्याने या प्रकरणाने अधिकच धक्कादायक स्वरूप धारण केले आहे.
या संपूर्ण प्रकरणाचा सखोल तपास सुरू असून, समोर आलेले सीसीटीव्ही फुटेज आणि डिजिटल पुरावे तपासासाठी अत्यंत महत्त्वाचे मानले जात आहेत.
